రఫెల్ నాదల్ ఎంత పనిచేశాడు: సోషల్ మీడియాలో వీడియో వైరల్

హైదరాబాద్: యుఎస్ ఓపెన్‌కు సంబంధించిన ఓ వీడియో ఇప్పుడు సోషల్ మీడియాలో వైరల్ అయింది. టోర్నీలో భాగంగా స్పెయిన్ బుల్ రఫెల్ నాదల్ క్వార్టర్ ఫైనల్స్‌లో భాగంగా 2014 ఛాంపియన్ మారిన్‌ సిలిచ్‌‌పై 6-3, 3-6, 6-1, 6-2 తేడాతో విజయం సాధించిన సంగతి తెలిసిందే.

ఈ మ్యాచ్ అనంతరం రఫెల్ నాదల్ చేసిన ఓ పని అందరినీ ఆకట్టుకుంది. మ్యాచ్‌ ముగిసిన తర్వాత తన ఆటోగ్రాఫ్‌ కోసం ఎదురుచూస్తూ ఏడుస్తోన్న ఓ చిన్నారిని నాదల్ ముద్దు చేశాడు. గ్యాలరీ నుంచి అతడిని ఎత్తుకొని తనవద్దకు తీసుకున్న రఫా... ఆ చిన్నారి ఏడుపు ఆపేవరకు ఊరడించాడు.

అంతేకాదు చిన్నారి కన్నీరు తుడిచాడు. అనంతరం చిన్నారి వద్ద నుంచి టోపీ తీసుకొని ఆటోగ్రాఫ్ ఇచ్చాడు. ఈ మొత్తం తతంగానికి సంబంధించిన వీడియోని యూఎస్‌ ఓపెన్‌ నిర్వాహకులు తమ ట్విట్టర్‌లో పోస్టు చేశారు. ఇది టెన్నిస్ అభిమానులను ఎంతగానో ఆకట్టుకుంటోంది.