సానియాపై ఆంక్షలు: అత్తగారి పెత్తనం?

కరాచీ: టెన్నిస్ తార సానియా మీర్జాపై అప్పుడే అత్తగారి పెత్తనం మొదలైంది. సానియాకు షోయబ్ మాలిక్ తల్లి నూర్జహాన్ ఆంక్షలు పెడుతున్నట్లు వార్తలు వస్తున్నాయి. సానియా పొట్టి స్కర్టులు వేసుకోకూడదని, టెన్నిస్ క్రీడకు స్వస్తి చెప్పాలని ఆమెకు కాబోయే అత్తగారు నూర్జహాన్ అభిప్రాయపడుతున్నట్లు పాకిస్తాన్ కు చెందిన ఒక ప్రముఖ దినపత్రిక రాసింది. పెళ్లి తర్వాత సానియా ఇంటి పనులకే పరిమితం కావాలని, ఇంటి వద్దనే ఉండాలని ఆమె కోరుకుంటున్నట్లు ఆ వార్తలు తెలియజేస్తున్నాయి. సానియా నిండైన దుస్తులే వాడాలని కూడా ఆమె కోరుకుంటున్నట్లు పాకిస్తానీ పత్రిక రాసింది.

అయితే మీడియా వార్తలను షోయబ్ మాలిక్ సోదరుడు ఇమ్రాన్ మాలిక్ ఖండించారు. ఆ విధమైన ఊహాగానాలను ప్రచారం చేయడంపై ఆయన తీవ్రంగా మండిపడ్డారు. తమ తల్లి మీడియాతో మాట్లాడనే లేదని ఆయన ఒక ప్రముఖ టీవీ చానెల్ తో అన్నారు. సానియా భారత్ తరఫున ఆడవచ్చునని కూడా ఆయన అన్నారు. అనారోగ్యం కారణంగా తమ తల్లి బయటకు కూడా రాలేదని ఆయన అన్నారు. సానియా, షోయబ్ దుబాయ్ లో ఉండడం కూడా ఇష్టం లేదని, పాకిస్తాన్ లోనే ఉండాలని కూడా నూర్జహాన్ అభిప్రాయపడుతున్నట్లు వార్తలు వచ్చాయి.