లాకర్‌ రూమ్‌లో వెక్కివెక్కి: సెరెనాతో శత్రుత్వంపై తన బయోగ్రఫీలో షరపోవా

ఓటమి వారిని భయానికి లోను చేసింది

‘టెన్నిస్‌ కోసమే పుట్టారా అన్నట్టుగా భావించిన ఆ సిస్టర్స్‌లో ఒకరి ఓటమి వారిని భయానికి లోనుచేసి ఉంటుంది' అని బయోగ్రఫీలో షరపోవా రాసుకుంది. వింబుల్డన్‌లో ఆమెను ఓడించినందుకు సెరెనా తనను ఎంతో ద్వేషించి ఉంటుందని పే ర్కొంది. బహుశా ఆ ఘటన తనపై ఆధిపత్యం చెలాయించాలన్న కసిని సెరెనాలో పెంచి ఉంటుందని అభిప్రాయపడింది.

సెరెనా నాపై ద్వేషం పెంచుకుంది

‘వింబుల్డన్‌లో అనేక అవాంతరాలను అధిగమించి నాలాంటి ఒక శ్వేత వర్ణపు క్రీడాకారిణి ఆమెను ఓడించడం వల్లే సెరెనా నాపై ద్వేషం పెంచుకుంది. లాకర్‌ రూమ్‌లో ఆమె ఏడవటం కూడా నేను చూశాను. అది ఆమెను మరింతగా బాధపెట్టి ఉంటుంది. ఇన్నేళ్ల పాటు ఆమెను ఓడించడంలో నేను సఫలం కాలేకపోయాను. ఇంకా చెప్పాలంటే తన భారీ, బలమైన శరీరంతోనే ఆమె నన్ను భయపెట్టేసేది' అని షరపోవా తన బయోగ్రఫీలో రాసుకొచ్చింది.

ఆరేళ్ల వయసులోనే రష్యా నుంచి ఫ్లోరిడాకు

టెన్నిస్‌ కెరీర్‌ కోసం ఆరేళ్ల వయసులోనే తాను రష్యా నుంచి ఫ్లోరిడాకు వెళ్లిన వైనాన్ని కూడా షరపోవా పుస్తకంలో వివరించింది. అక్కడ తాను సెరెనా సోదరీమణులను రహస్యంగా చూసిన విషయాన్ని ఈ సందర్భంగా గుర్తు చేసుకుంది. ‘వారిని ఆరాధించాలని గానీ, వారి అభిమానిగా ఉండాలని అప్పట్లోనే అనుకోలేదు' అని చెప్పుకొచ్చింది.

మా మధ్య విరోధానికి కారణం అదే

ఒకరిని మించి మరొకరు రాణించాలనే తలంపే బహుశా మా మధ్య విరోధానికి కారణమని సెరెవా విలియమ్స్ చెప్పుకొచ్చింది. అంతేకాదు పరోక్షంగా తాను అందమైన, సున్నితమైన దానినని చెప్పే ప్రయత్నం చేసింది. అయితే ఆమె మాటలపై ప్రపంచ వ్యాప్తంగా పెద్ద సంఖ్యలో విమర్శలు వినిపించాయి.

క్రీడా విశ్లేషకులు ఘాటు వ్యాఖ్యలు

23 గ్రాండ్‌స్లామ్‌లు గెలిచిన సెరెనాతో 5 గ్రాండ్‌స్లామ్‌లు గెలిచిన మరియా షరపోవాకు అసలు పోలికే లేదని క్రీడా విశ్లేషకులు ఘాటుగా వ్యాఖ్యానించారు. సెరెనాను విమర్శించే క్రమంలో ఈ పుస్తకంలో ఏకంగా 106 సార్లు ఆమె పేరును షరపోవా ప్రస్తావించిందని విశ్లేషకులు విమర్శిస్తున్నారు.