నేడే సానియా, షోయబ్ ల పెళ్లి

హైదరాబాద్: టెన్నిస్ క్రీడాకారిణి సానియా మీర్జా, పాకిస్తాన్ క్రికెటర్ షోయబ్ మాలిక్ ల వివాహం ఈ రోజు శుక్రవారం సాయంత్రమే జరుగుతుంది. వివాహానంతర విందు ఈ నెల 15వ తేదీన యధావిధిగా హైదరాబాదులోని తాజ్ కృష్ణాలో జరుగుతుంది. ఈ రోజు సాయంత్రం ఏడున్నర గంటలకు సానియా, షోయబ్ ల వివాహం జరుగుతుంది.

సాయంత్రం మగరీబ్ నమాజ్ ముగిసిన తర్వాత ఏడు గంటలకు వివాహం జరుగుతుంది. అనంతరం నిఖానామాపై సానియా, షోయబ్ సంతకాలు చేస్తారు. ఈ పెళ్లికి ఇరు కుటుంబాలకు చెందిన సన్నిహితులు మాత్రమే హాజరవుతారు. షోయబ్ కుటుంబ సభ్యులు ఇప్పటికే హైదరాబాద్ చేరుకున్నారు. తాజ్ కృష్ణాలో ఈ నెల 15వ తేదీన జరిగే విందుకు కూడా పరిమితంగా అతిథులను ఆహ్వానించారు. గోపీచంద్, సైనా నెహ్వాల్, వివియస్ లక్ష్మణ్ వంటి వారికి విందు ఆహ్వానాలు వెళ్లాయి.