షోయబ్ చాలా మంచివాడు: సానియా

హైదరాబాద్: క్రికెటర్ షోయబ్ మాలిక్ కు టెన్నిస్ క్రీడాకారిణి సానియా మీర్జా, ఆమె కుటుంబ సభ్యులు పూర్తి మద్దతుగా నిలిచారు. షోయబ్ మాలిక్ చాలా మంచివాడని వారన్నారు. షోయబ్ ను విచారిస్తున్న పోలీసులతో వారు కూడా మాట్లాడారు. డబ్బుల కోసమే అయేషా కుటుంబ సభ్యులు ఇదంతా చేస్తున్నారని వారన్నారు. పోలీసుల విచారణకు షోయబ్ పూర్తిగా సహకరిస్తాడని వారు చెప్పారు. సోమవారం ఉదయం దాదాపు రెండు గంటలపాటు హైదరాబాద్ బంజారాహిల్స్ పోలీసులు షోయబ్ మాలిక్ ను విచారించారు.

విచారణ అనంతరం సానియా ఇంటి నుంచి వెలుపలికి వచ్చిన పోలీసు అధికారులను మీడియా ప్రతినిధులు చుట్టుముట్టారు. మీడియా ప్రతినిధులు వేసిన ప్రశ్నలకు వారు ఏ విధమైన సమాధానాలు చెప్పలేదు. అన్ని విషయాలూ చెప్తామని మాత్రమే వారన్నారు. అయేషా నిఖానామాపై షోయబ్ సంతకంపై పోలీసులు ఆరా తీస్తున్నట్లు తెలుస్తోంది. అయేషా ఇచ్చిన సాక్ష్యాధారాలను బట్టి పోలీసులు షోయబ్ ను ఆ తర్వాత విచారించే అవకాశాలున్నాయి. ఆదివారంనాడు మీడియా ప్రతినిధుల సమావేశంలో చెప్పిన విషయాలనే షోయబ్ మాలిక్ పోలీసులకు చెప్పినట్లు సమాచారం. కొత్త విషయాలేమీ ఆయన చెప్పలేదని అంటున్నారు.