సానియా ఇంటి వద్ద యువకుల గొడవ

హైదరాబాద్‌: హైదరాబాద్ టెన్నిస్ సంచలనం సానియా మీర్జా ఇంటి వద్ద ఇద్దరు యువకులు మంగళవారం అర్థరాత్రి హడావిడి చేశారు. దీనిపై సానియా మీర్జా హైదరాబాదులోని బంజారాహిల్స్ పోలీసు స్టేషన్ లో ఫిర్యాదు చేశారు. ఆ ఇద్దరు యువకులు దేవదిష్ మొహంతి, ఆశ్రఫ్ లను పోలీసులు అదుపులోకి తీసుకున్నారు. సానియాను పెళ్లి చేసుకుంటానని దేవదిష్ మొహంతి గొడవ చేసినట్లు సమాచారం. ఇతను కేరళకు చెందిన ఇంజనీర్ అని తెలుస్తోంది.

సానియా మీర్జా నిశ్చితార్థం ఈ నెల 10వ తేదీన జరుగుతోంది. ఆ రోజే ఆమె పెళ్లి ముహూర్తం కూడా ఖరారవుతోంది. ఈ నేపథ్యంలో ఆ యువకులు గొడవకు దిగినట్లు భావిస్తున్నారు. సానియాకు ప్రపంచవ్యాప్తంగా ఎనలేని అభిమానులున్నారు.