కెరీర్‌లో తొలిసారి డబుల్స్‌లో టాప్‌ టెన్‌లో సానియా

న్యూఢిల్లీ: భారత టెన్నిస్‌ మేటి సానియా మీర్జా తన కెరీర్‌లో మొదటిసారిగా డబ్ల్యుటిఎ ర్యాంకింగ్‌లలో డబుల్స్‌లో టాప్‌ టెన్‌లో స్థానం దక్కించుకొంది. యుఎస్‌ ఓపెన్‌లో సానియా తన రష్యన్‌ జోడి ఎలెనా వెస్నినాతో కలసి మూడవ రౌండ్‌లోకి ప్రవేశించిన తరువాత ఒక స్థానం పురోగమించింది. ప్రస్తుత భారత క్రీడాకారులలో డబుల్స్‌ టాప్‌ టెన్‌లో చోటు చేసుకున్న నాలుగవ ప్లేయర్‌ సానియా. వెటరన్‌లు లియాండర్‌ పేస్‌, మహేష్‌ భూపతి, నానాటికీ ర్యాంకింగ్‌ మెరుగవుతున్న రోహన్‌ బోపన్న ఎటిపి డబుల్స్‌ ర్యాంకింగ్‌లలో టాప్‌ టెన్‌లో ఇది వరకే చోటు చేసుకున్నారు. సానియా ప్రస్తుత క్యాలెండర్‌లో మూడు డబుల్స్‌ టైటిల్స్‌ను గెలుచుకున్నది.

ఈ క్యాలెండర్‌లో సానియా ఇప్పటివరకూ మూడు డబుల్స్‌ టైటిళ్లను సాధించి, మొత్తం గెలిచిన సంఖ్య12ట్రోఫీలకు చేరింది. వెస్నినాతో కలిసి ఇండియన్‌ వెల్స్‌, ఛార్లెస్‌టన్‌లో, కజకిస్తాన్‌ భాగస్వామి యరోస్లావాతో కలిసి కాలేజ్‌పార్క్‌లతో గెలుపు జోడీగా నిలిచింది. సానియా-వెస్నినా జోడీ నాలుగో స్థానంలో నిలిచింది. ప్రస్తుతం జరుగుతున్న యుఎస్‌ ఓపెన్‌లో రష్యా భాగస్వామి ఎలీనా వెస్నినాతో కలిసి మూడో రౌండ్‌ వరకూ వెళ్లి, మోకాలి గాయంతో ఆటకు దూరమైంది.

ఈ సందర్బంలో సానియా మిర్జా మాట్లాడుతూ 'నిద్ర లేచి ప్రపంచంలో టాప్‌ టెన్‌లోకి ప్రవేశించానని తెలుసుకున్నాను. ఇన్నేళ్లుగా అండగా నిలచినందుకు, అభిమానించినందుకు ప్రతి ఒక్కరికీ ధన్యవాదాలు" అని సానియా తన ట్విట్టర్‌ పేజ్‌లో రాసింది. ఈ ఘనతకు సానియాను మహేష్‌ భూపతి అభినందించాడు. అయితే, ఈ సంవత్సరపు చివరి గ్రాండ్‌ శ్లామ్‌లో సింగిల్స్‌లో మొదటి రౌండ్‌తోనే తిరుగుముఖం పట్టినందుకు సానియా సింగిల్స్‌ ర్యాంకింగ్‌ 64 నుంచి 81కి పడిపోయింది. అయితే సింగిల్స్‌లో మాత్రం సానియా 81వ స్థానంలో ఉంది. మోకాలి గాయం వల్ల ఈ సీజన్‌లో సానియా ఆడే అవకాశాలు లేకపోవడంతో భారత్‌-రష్యా జోడీ కొన్ని పాయింట్లు కోల్పోయే అవకాశముంది. ప్రస్తుతం ఈ జోడీ 4788 పాయింట్లతో ఉండగా, యరోస్లావా ష్వెదోవా, అమెరికన్‌ వైనా జోడీ 4685 పాయింట్లతో చేరువలో వీరికి చేరువలో ఉంది.