గంటా 43 నిమిషాల పాటు జరిగిన సమరంలో..:
గంటా 43 నిమిషాల పాటు జరిగిన ఈ మ్యాచ్లో.. సెరెనా ఏడు, జార్జీ 6 ఏస్లను సంధించారు. అయితే ఆరుసార్లు డబుల్ ఫాల్ట్లు చేసిన ఇటాలియన్ మూల్యం చెల్లించుకుంది. మరో క్వార్టర్స్ మ్యాచ్లో 11వ సీడ్ కెర్బర్ (జర్మనీ) 6-3, 7-5తో కసాట్కినా (రష్యా)పై గెలిచింది. ఇతర మ్యాచ్ల్లో ఒస్టాపెంకో (లాత్వియా) 7-5, 6-4తో సిబుల్కోవా (స్లొవేకియా)పై, జార్జెస్ (జర్మనీ) 3-6, 7-5, 6-1తో బెర్టెన్స్ (నెదర్లాండ్స్)పై నెగ్గి సెమీస్ బెర్త్ను ఖాయం చేసుకున్నారు.
గ్రాస్కోర్టులో ఇది 100వ విజయం
గ్రాస్కోర్టులో అమెరికన్కు ఇది 100వ విజయం కాగా, ఓవరాల్గా కెరీర్లో ఇది 35వ గ్రాండ్స్లామ్ సెమీఫైనల్. 2013 తర్వాత టాప్-40 ర్యాంక్ లోపు ఉన్న ప్రత్యర్థులను ఎదుర్కోకుండా సెమీస్ చేరిన తొలి క్రీడాకారిణిగా సెరెనా రికార్డులకెక్కింది.
మ్యాచ్ ఓడిపోతానని ఆందోళన చెందలేదు
‘నేను ఏ దశలోనూ మ్యాచ్ ఓడిపోతానని ఆందోళన చెందలేదు. తొలి సెట్ కోల్పోయినపుడు కూడా నా ప్రత్యర్థి బాగా ఆడుతోందని అనుకున్నాను. చాలా ఏళ్లుగా పరిస్థితులు ఎలా ఉన్నా పోరాటం కొనసాగించడం నాకు అలవాటుగా మారింది. ఈ మ్యాచ్లోనూ అదే చేశాను. నా కూతురికి కూడా ఈ సూత్రం చెప్పాలని అనుకుంటున్నాను' అని మ్యాచ్ అనంతరం సెరెనా వ్యాఖ్యానించింది. గురువారం జరిగే సెమీఫైనల్లో జర్మనీ ప్లేయర్, 13వ సీడ్ జూలియా జార్జెస్తో సెరెనా తలపడుతుంది.
దివిజ్ శరణ్ జంట ఓటమి
పురుషుల డబుల్స్లో దివిజ్ శరణ్ (భారత్)-ఆర్తెమ్ సితాక్ (న్యూజిలాండ్) జంట పోరాటం ముగిసింది. మంగళవారం జరిగిన క్వార్టర్ ఫైనల్లో శరన్-సితాక్ ద్వయం 6-7 (4/7), 6-7 (5/7), 7-6 (7/3), 4-6తో ఏడో సీడ్ మైక్ బ్రయాన్-జాక్ సోక్ (అమెరికా) జంట చేతిలో పోరాడి ఓడింది. బుధవారం జరిగే పురుషుల సింగిల్స్ క్వార్టర్ ఫైనల్స్లో నొవాక్ జొకోవిచ్ (సెర్బియా)తో నిషికోరి (జపాన్); రాఫెల్ నాదల్ (స్పెయిన్)తో డెల్పొట్రో (అర్జెంటీనా); అండర్సన్ (దక్షిణాఫ్రికా)తో రోజర్ ఫెడరర్ (స్విట్జర్లాండ్); మిలోస్ రావ్నిచ్ (కెనడా)తో జాన్ ఇస్నెర్ (అమెరికా) తలపడతారు.