చరిత్ర సృష్టించేదెవరు?: ఆస్ట్రేలియన్ ఓపెన్ ఫైనల్‌లో నాదల్ Vs ఫెదరర్

By Nageshwara Rao

Updated: Tuesday, November 14, 2017, 10:15 [IST]

హైదరాబాద్: ఆస్ట్రేలియన్ ఓపెన్‌లో చరిత్రలో అరుదైన మ్యాచ్ ఆదివారం జరగనుంది. స్పెయిన్ టెన్నిస్ ప్లేయర్ రఫెల్ నాదల్ తన కెరీర్‌లో 15వ గ్రాండ్‌స్లామ్‌ టైటిల్‌కు అడుగు దూరంలో నిలిచాడు. శుక్రవారం జరిగిన పురుషుల సింగిల్స్‌ రెండో సెమీఫైనల్లో తొమ్మిదో సీడ్‌ నాదల్‌ 4 గంటల 56 నిమిషాల్లో 6-3, 5-7, 7-6 (7/5), 6-7 (4/7), 6-4తో బల్గేరియా ఆటగాడు, 15వ సీడ్‌ గ్రిగోర్‌ దిమిత్రోవ్‌ (బల్గేరియా)పై విజయం సాధించి పైనల్స్‌కు దూసుకెళ్లాడు.

మ్యాచ్ సమయం: 2PM IST
ఏ టీవీలో ప్రసారం: LIVE on Sony SIX, HD

దీంతో ఆదివారం జరిగే ఫైనల్లో 17వ సీడ్, మాజీ చాంపియన్ రోజర్‌ ఫెదరర్(స్విట్జర్లాండ్‌)తో నాదల్‌ తలపడనున్నాడు. ఈ మ్యాచ్‌లో నాదల్ విజేతగా నిలిస్తే, ఓపెన్‌ ఎరాలో ఒక్కో గ్రాండ్‌స్లామ్‌ను రెండుసార్లు సాధించిన తొలి ఆటగాడిగా చరిత్ర సృష్టిస్తాడు. మొత్తంగా ఈ ఘనత సాధించిన మూడో ప్లేయర్‌గా నాదల్ చరిత్ర సృష్టిస్తాడు.

ఫెడరర్‌తో 35వసారి తలపడనున్న నాదల్‌

రోజర్ ఫెడరర్‌తో 35వసారి తలపడనున్న నాదల్‌ టైటిల్‌ పోరులో ఫేవరెట్‌గా బరిలోకి దిగనున్నాడు. ముఖాముఖి రికార్డులో నాదల్ 23-11తో ఫెదరర్‌పై ఆధిక్యంలో నిలిచాడు. 2009లో ఫెదరర్‌ను ఓడించి టైటిల్‌ నెగ్గిన నాదల్ మరోసారి ఆ ఫీట్‌ను పునరావృతం చేస్తాడో లేదో ఈ మ్యాచ్‌లో చూడాలి.

2011 ఫ్రెంచ్‌ ఓపెన్ తర్వాత ఇదే తొలిసారి

అంతేకాదు 2011 ఫ్రెంచ్‌ ఓపెన్ టోర్నీ తర్వాత వీరిద్దరూ ఓ గ్రాండ్‌స్లామ్‌ టోర్నీ ఫైనల్లో తలపడనుండటం ఇదే తొలిసారి. ఇక గ్రాండ్‌స్లామ్‌ టోర్నీ మ్యాచ్‌ల ముఖాముఖి రికార్డులో కూడా నాదల్‌ 9-2తో ఫెదరర్‌పై ఆధిక్యంలో నిలిచాడు. గతంలో ఆస్ట్రేలియన్ ఓపెన్‌లో వీరిద్దరూ మూడుసార్లు తలపడగా మూడుసార్లూ నాదల్‌నే విజయం వరించింది.

నాదల్‌ను ఓడించి ఫెదరర్‌కు ఏడు సంవత్సరాలైంది

ఇదిలా ఉంటే ఓ గ్రాండ్‌స్లామ్‌ టోర్నీ మ్యాచ్‌లో నాదల్‌ను ఓడించి ఫెదరర్‌కు ఏడు సంవత్సరాలైంది. చివరిసారిగా 2007లో జరిగిన వింబుల్డన్ ఫైనల్లో ఐదు సెట్‌ల పోరులో నాదల్‌పై ఫెదరర్ విజయం సాధించాడు. ఇక ఈ మ్యాచ్‌లో పెదరర్ విజయం సాధిస్తే తన ఖాతాలో 18వ గ్రాండ్‌ స్లామ్‌ టైటిల్ చేరుతుంది.

నాదల్ భావోద్వేగం

రెండేళ్ల విరామం తర్వాత ఒక గ్రాండ్‌స్లామ్‌ టోర్నీలో ఫైనల్‌కు వెళ్లిన ఆనందంలో నాదల్‌ భావోద్వేగానికి గురయ్యాడు. దిమిత్రోవ్‌ అనవసర తప్పిదం చేయడంతో ఈ మ్యాచ్‌లో విజయం సాధించిన అనంతరం కోర్టులో బోర్లా పడిపోయిన నాదల్ సంతోషంలో మునిగిపోయాడు. రిస్ట్‌ బ్యాండ్‌ అభిమానుల్లోకి గిరాటేసి తాను సాధించానన్నట్లు గాల్లోకి పంచ్‌లు విసిరాడు.