జకోవిచ్ స్ట్రోక్.. సిన్నర్ లవ్ ట్రాక్!: గర్ల్‌ఫ్రెండ్ లైలా బ్యూటీకి నెటిజన్లు ఫిదా!

Australian Open 2026: ఆస్ట్రేలియన్ ఓపెన్ 2026లో ఇటలీ టెన్నిస్ స్టార్ యానిక్ సిన్నర్ అద్భుత ప్రయాణం సెమీఫైనల్‌తో ముగిసింది. టెన్నిస్ దిగ్గజం నొవాక్ జకోవిచ్ చేతిలో ఓటమి పాలైన సిన్నర్.. ప్రస్తుతం తన ఆటతోనే కాకుండా తన వ్యక్తిగత జీవితం వల్ల కూడా వార్తల్లో నిలుస్తున్నారు. ముఖ్యంగా అతని గర్ల్‌ఫ్రెండ్, ప్రముఖ మోడల్ లైలా హసనోవిక్ గురించి సోషల్ మీడియాలో హాట్ టాపిక్‌గా మారింది.

ఎవరీ లైలా హసనోవిక్?
యానిక్ సిన్నర్ ప్రియురాలు లైలా హసనోవిక్ డెన్మార్క్‌కు చెందిన అత్యంత ప్రజాదరణ పొందిన మోడల్, డిజిటల్ కంటెంట్ క్రియేటర్. ఆమె 'అర్మానీ బ్యూటీ' వంటి అంతర్జాతీయ బ్రాండ్‌లకు మోడలింగ్‌ చేశారు. ఇన్‌స్టాగ్రామ్, టిక్‌టాక్‌లలో ఆమెకు లక్షలాది మంది ఫాలోవర్లు ఉన్నారు. వెనిస్ ఫిల్మ్ ఫెస్టివల్ వంటి అంతర్జాతీయ వేదికలపై ఆమె తన మెరుపులు మెరిపించారు.

యానిక్ సిన్నర్-లైలా లవ్ స్టోరీ మొదలైందిలా..
గతంలో యానిక్ సిన్నర్ పేరు టెన్నిస్ క్రీడాకారిణి అన్నా కాలిన్స్‌కాయాతో వినిపించింది. అయితే మే 2024లో వీరిద్దరూ విడిపోయిన తర్వాత సిన్నర్ జీవితంలోకి లైలా ప్రవేశించింది. వీరిద్దరూ తమ సంబంధం గురించి సోషల్ మీడియాలో అధికారికంగా ప్రకటించనప్పటికీ.. అక్టోబర్ 2025లో జరిగిన వియన్నా ఓపెన్ సందర్భంగా లైలా, సిన్నర్ తల్లిదండ్రులతో కలిసి ప్లేయర్ బాక్స్‌లో కనిపించడం హాట్ టాపిక్‌గా మారింది. ఆ టోర్నీలో టైటిల్ గెలిచిన తర్వాత సిన్నర్ తన ప్రసంగంలో తన గర్ల్‌ఫ్రెండ్‌కు ధన్యవాదాలు తెలపడంతో వీరి బంధంపై స్పష్టత వచ్చింది.

క్వార్టర్ ఫైనల్స్‌లో ఎందుకు కనిపించలేదు?
బెన్ షెల్టన్‌తో జరిగిన ఉత్కంఠభరితమైన క్వార్టర్ ఫైనల్ మ్యాచ్‌లో లైలా స్టేడియంలో కనిపించకపోవడంతో అభిమానులు ఆశ్చర్యపోయారు. అయితే దీనికి కారణం వారి మధ్య విభేదాలు కాదు, ఆమె వృత్తిపరమైన బాధ్యతలు. లైలా ప్రస్తుతం కోపెన్‌హాగన్ ఫ్యాషన్ వీక్‌లో బిజీగా ఉన్నారు. జనవరి 30, 2026 వరకు జరిగే ఈ ఈవెంట్‌లో ఆమె వివిధ బ్రాండ్‌ల కోసం ర్యాంప్ వాక్ చేస్తున్నారు. సిన్నర్ సెమీఫైనల్‌లో నిష్క్రమించినప్పటికీ.. కోర్టులో అతని పోరాట పటిమ, కోర్టు బయట అతని వ్యక్తిగత జీవితం ఈ ఆస్ట్రేలియన్ ఓపెన్ సీజన్‌లో ప్రత్యేక ఆకర్షణగా నిలిచాయి.