ఉక్రెయిన్ స్టార్ విధ్వంసం.. మూడోసారి ఇటాలియన్ ఓపెన్ కైవసం!

ఉక్రెయిన్ టెన్నిస్ స్టార్ ఎలినా స్విటోలినా ఇటాలియన్ ఓపెన్ టైటిల్‌ను మూడోసారి కైవసం చేసుకుంది. హోరాహోరీగా సాగిన మూడు సెట్ల మ్యాచ్‌లో అమెరికన్ క్రీడాకారిణి కోకో గాఫ్‌ను ఓడించి ఈ ప్రతిష్టాత్మక విజయాన్ని సాధించింది. ఈ విజయంతో ఆమె తన కెరీర్‌లో మరో మైలురాయిని చేరుకుంది. దాదాపు మూడు గంటల పాటు సాగిన ఈ రసవత్తర పోరులో స్విటోలినా, గాఫ్‌ను 6-4, 6-7 (3), 6-2 తేడాతో ఓడించింది. ఇది ఆమెకు 2018 నాటి ఇటాలియన్ ఓపెన్ విజయం తర్వాత దక్కిన తొలి డబ్ల్యూటీఏ 1000 టోర్నమెంట్ టైటిల్ కావడం విశేషం. స్విటోలినా అద్భుతమైన ఫామ్‌ను కొనసాగిస్తూ 2017లో కూడా ఇక్కడ టైటిల్ గెలిచింది.

మ్యాచ్ మొదటి సెట్‌లో ఒకానొక దశలో కోకో గాఫ్ 4-2 ఆధిక్యంతో దూసుకుపోయింది. అయితే,స్విటోలినా అద్భుతమైన పునరాగమనం చేసి తొలి సెట్‌ను కైవసం చేసుకుంది. రెండో సెట్‌ను టై-బ్రేకర్ ద్వారా గాఫ్ గెలుచుకోగా.. నిర్ణయాత్మక మూడో సెట్‌లో అనుభవజ్ఞురాలైన స్విటోలినా తన స్థాయి ప్రదర్శనతో గాఫ్‌కు ఏమాత్రం అవకాశం ఇవ్వకుండా మ్యాచ్‌ను సొంతం చేసుకుంది. ప్రపంచ 10వ ర్యాంకర్ స్విటోలినాకు గాఫ్‌పై ఇది వరుసగా మూడో విజయం.

గాఫ్ విషయానికొస్తే, ఆమె వరుసగా రెండో ఏడాది ఇటాలియన్ ఓపెన్ ఫైనల్ అడ్డంకిని దాటలేకపోయింది. గత ఏడాది జాస్మిన్ పావోలిని చేతిలో ఓడిపోయినప్పటికీ, ఆ తర్వాత ఫ్రెంచ్ ఓపెన్ టైటిల్‌ను గెలుచుకుంది. తన కెరీర్‌లో 20వ టైటిల్ గెలిచిన తర్వాత ఎలినా స్విటోలినా మాట్లాడుతూ, “నేను ఇక్కడ ట్రోఫీ గెలిచి ఎనిమిదేళ్లు పండటం నమ్మడం చాలా కష్టం. ఈ రెండు వారాలు ఇక్కడ గడిపినందుకు నేను చాలా సంతోషంగా ఉన్నాను,” అని పేర్కొంది.

పురుషుల విభాగంలో, ప్రపంచ నంబర్ వన్ ఆటగాడు జానిక్ సిన్నర్, క్యాస్పర్ రూడ్‌తో ఫైనల్‌లో తలపడనున్నాడు. సెమీఫైనల్‌లో ఇటలీకి చెందిన సిన్నర్, డానిల్ మెద్వదేవ్‌ను 6-2, 5-7, 6-4 తేడాతో ఓడించాడు. నోవాక్ జొకోవిచ్ తర్వాత తొమ్మిది మాస్టర్స్ 1000 టైటిల్స్ గెలిచిన రెండో పురుష ఆటగాడిగా నిలిచేందుకు అతడు ఒక విజయం దూరంలో ఉన్నాడు. జొకోవిచ్ ప్రతి మాస్టర్స్ టోర్నమెంట్‌ను కనీసం రెండుసార్లు గెలిచాడు. మరోవైపు, రూడ్ తన సెమీఫైనల్‌లో లుసియానో ​​డార్డేరీని 6-1, 6-1తో సునాయాసంగా ఓడించి ఫైనల్‌కు చేరుకున్నాడు.