టైటిల్‌కు అడుగుదూరంలో సెరెనా

ఆరంభం నుంచి దూకుడుతో ఆడి

గురువారం జరిగిన మహిళల సింగిల్స్‌ సెమీఫైనల్లో 25వ సీడ్‌ సెరెనా 6-2, 6-4తో 13వ సీడ్‌ జూలియా జార్జెస్‌ (జర్మనీ)ను చిత్తుచేసింది. ఆరంభం నుంచి ఆత్మవిశ్వాసంతో ఆడిన సెరెనా ప్రత్యర్థికి ఎలాంటి అవకాశం ఇవ్వకుండా 70 నిమిషాల్లోనే మ్యాచ్‌ ముగించింది. దీంతో ఓపెన్‌ ఎరాలో గ్రాండ్‌స్లామ్‌ ఫైనల్‌ చేరిన పెద్ద వయసు క్రీడాకారిణిగా సెరెనా (36 ఏళ్ల 291 రోజులు) నిలిచింది.

అమీతుమీ తేల్చుకోవడానికి ఫైనల్లో సెరెనాతో కెర్బర్‌

రికార్డు స్థాయిలో పదోసారి వింబుల్డన్‌ ఫైనల్‌ చేరిన సెరెనా శనివారం తుదిపోరులో పదకొండో సీడ్‌ కెర్బర్‌ (జర్మనీ)తో తలపడనుంది. 5 ఏస్‌లు సంధించిన సెరెనా.. 16 విన్నర్‌లు కొట్టింది. 24వ గ్రాండ్‌స్లామ్‌ టైటిల్‌పై కన్నేసిన సెరెనా శనివారం జరిగే ఫైనల్లో మాజీ ప్రత్యర్థి ఏంజెలికా కెర్బర్‌ (జర్మనీ)తో అమీతుమీ తేల్చుకోనుంది. మాజీ నంబర్‌ వన్‌ కెర్బర్‌ రెండేళ్ల క్రితం ఇక్కడ తుదిపోరులో సెరెనాకే టైటిల్‌ చేజార్చుకుంది.

ఫెదరర్ తప్పుకోవడంతో.. నాదల్ పని సులువైంది:

పురుషుల సింగిల్స్‌లో ఫెదరర్ క్వార్టర్స్‌లో నిష్క్రమించడంతో రఫెల్‌ నాదల్ టైటిల్‌కు మార్గం సులువైంది. క్వార్టర్స్‌లో రెండోసీడ్‌ నడాల్‌ 7-5, 6-7(7), 4-6, 6-4, 6-4తో డెల్‌పొట్రో (అర్జెంటీనా)పై నెగ్గి సెమీస్‌ చేరాడు. జొకోవిచ్‌తో నాదల్ సెమీస్‌ ఆడనున్నాడు. మరో సెమీ్‌సలో కెవిన్‌ అండర్సన్‌తో జాన్‌ ఇస్నర్‌ (అమెరికా) తలపడతాడు.