సానియాకు ప్రత్యేకమైన రోజు: తండ్రి

హైదరాబాద్: తన కూతురు, టెన్నిస్ సంచలనం సానియా మీర్జాకు ఇది ప్రత్యేకమైన రోజు అని ఆమె తండ్రి ఇమ్రాన్ మీర్జా అన్నారు. సానియా మీర్జా నిశ్చితార్థం శుక్రవారం జరుగుతున్న విషయం తెలిసిందే. ఈ సందర్భంగా సానియా ఇంటి ముందు పెద్ద యెత్తున మీడియా ప్రతినిధులు గుమికూడారు. సానియా నిశ్చితార్థం వివరాలు చెప్పాలని వారు సానియా మీర్జా తండ్రి ఇమ్రాన్ మీర్జాను కోరారు.

సానియా మీర్జా నిశ్చితార్థం పూర్తిగా ప్రైవేట్ కార్యక్రమమని, అందువల్ల మీడియాను ఆహ్వానించడం లేదని ఆయన అన్నారు. తమను ఇంతటితో వదిలేయాలని ఆయన మీడియా ప్రతినిధులను కోరారు. ఇది సానియాకు ప్రత్యేకమైన రోజు అంటూ తమ వ్యక్తిగత జీవితాలకు అడ్డురావద్దని, ఈ కార్యక్రమాన్ని ఆనందించడానికి పూర్తిగా ఆమెకు అవకాశం ఇవ్వాలని ఆయన విజ్ఞప్తి చేశారు. రాత్రి ఎనిమిదిన్నర గంటలకు సానియా నిశ్చితార్థం జరుగుతుందని ఆయన చెప్పారు.