ఫ్రెంచ్‌ ఓపెన్‌.. కెర్బర్‌, వీనస్‌ ఔట్‌

కెర్బర్‌కు షాక్:

ఆదివారం జరిగిన మహిళల సింగిల్స్‌ తొలి రౌండ్లో ఐదో సీడ్‌ కెర్బర్‌ 4-6, 2-6తో వరుస సెట్లలో ప్రపంచ ర్యాంకింగ్‌లో 81వ స్థానంలో ఉన్న పొటపోవా చేతిలో ఓడిపోయింది. కెరీర్‌లో తొలిసారి ఫ్రెంచ్‌ ఓపెన్‌ మొయిన్‌ డ్రాలో ఆడుతున్న పొటపోవా.. కెర్బర్‌ను ఓ ఆటాడుకుంది. టాప్‌-10 క్రీడాకారిణిపై నెగ్గడం పొటపోవాకు ఇదే తొలిసారి. మరోవైపు ఫ్రెంచ్‌ ఓపెన్ తొలి రౌండ్లో ఓడడం కెర్బర్‌కు ఇది ఆరోసారి.

వీనస్‌ ఔట్‌:

తొమ్మిదో సీడ్‌ ఎలీనా స్వితోలినా (ఉక్రెయిన్‌) 6-3, 6-3తో సీనియర్ వీనస్‌ను ఓడించింది. 73 నిమిషాలపాటు జరిగిన ఈ మ్యాచ్‌లో వీనస్‌ ఏదశలోనూ స్వితోలినాకు పోటీనివ్వలేదు. మూడు డబుల్‌ ఫాల్ట్‌లు చేసిన వీనస్‌.. 34 అనవసర తప్పిదాలు చేసి మూల్యం చెల్లించుకుంది. 22వసారి ఫ్రెంచ్‌ ఓపెన్‌లో పాల్గొన్న వీనస్‌.. 2006 తర్వాత ఈ టోర్నీలో క్వార్టర్‌ ఫైనల్‌ దాటలేకపోయింది.

అతి కష్టం మీద:

19వ సీడ్‌ ముగురుజ అతి కష్టం మీద రెండో రౌండ్లో ప్రవేశించింది. తొలి రౌండ్లో 5-7, 6-2, 6-2తో టౌన్‌సెండ్‌ (అమెరికా)ను ఓడించింది. కుకోవా (స్లొవేకియా) 6-4, 6-2తో కుజెనొత్సొవాపై గెలిచింది. మరోవైపు ప్లిస్కోవా (చెక్‌ రిపబ్లిక్‌) 6-2, 6-3తో బ్రెంగెల్‌ (అమెరికా)పై గెలిచింది. 15వ సీడ్‌ బెలిండా బెన్సిచ్‌ (స్విట్జర్లాండ్‌) 6-1, 6-4తో జెస్సికా పొంచెట్‌ (ఫ్రాన్స్‌)పై గెలిచింది.