ఫ్రెంచ్ ఓపెన్: తొలి రౌండ్లోనే పలాయనం చిత్తగిస్తున్న స్టార్ ప్లేయర్లు

స్టానిస్లాస్‌ వావ్రింకా (స్విట్జర్లాండ్‌) తొలి రౌండ్లోనే

ఫ్రెంచ్‌ ఓపెన్లో మరో షాక్‌. గతేడాది రన్నరప్‌ స్టానిస్లాస్‌ వావ్రింకా (స్విట్జర్లాండ్‌) తొలి రౌండ్లోనే ఇంటిముఖం పట్టాడు. మ్యాచ్‌ ఆసాంతం ఫిట్‌నెస్‌ సమస్యలతో ఇబ్బందిపడిన వావ్రింకా పురుషుల సింగిల్స్‌ తొలి రౌండ్లో 2-6, 6-3, 6-4, 6-7 (5-7), 3-6తో గర్సియా లోపెజ్‌ (స్పెయిన్‌)పై పోరాడి ఓడాడు. తొలి సెట్లో ఓడినా.. ఆ తర్వాత రెండు సెట్లు గెలిచి జోరందుకున్న వావ్రింకా.. నాలుగో సెట్‌ను టైబ్రేకర్‌లో చేజార్చుకున్నాడు. ఐదో సెట్లో ప్రత్యర్థికి రెండుసార్లు సర్వీసు అప్పగించిన అతను.. ఆపై సెట్‌తో పాటు మ్యాచ్‌ను కోల్పోయాడు. ఈ మ్యాచ్‌లో 4 డబుల్‌ఫాల్ట్స్‌ చేసిన వావ్రింకా 72 అనవసర తప్పిదాలతో ఓటమి కొనితెచ్చుకున్నాడు.

విక్టోరియా అజరెంక తొలి రౌండ్లోనే

మహిళల సింగిల్స్‌లో బెలారస్‌ భామ విక్టోరియా అజరెంక తొలి రౌండ్లోనే ఓడిపోయింది. సినియకోవా (చెక్‌ రిపబ్లిక్‌) 7-5, 7-5తో అజరెంకపై గెలిచింది. ఈ మ్యాచ్‌లో అజరెంక రెండు డబుల్‌ఫాల్ట్స్‌తో పాటు 38 అనవసర తప్పిదాలు చేసింది. అంతేకాక ఐదుసార్లు సర్వీసు కోల్పోయింది.

వోజ్నియాకి , ఎనిమిదోసీడ్‌ క్విటోవా ముందంజ

మరోవైపు రెండోసీడ్‌ వోజ్నియాకి (డెన్మార్క్‌), ఎనిమిదోసీడ్‌ క్విటోవా (చెక్‌ రిపబ్లిక్‌) ముందంజ వేశారు. సెపెడ్‌ రేగ్‌ (పరాగ్వే) నుంచి గట్టిపోటీ ఎదుర్కొన్న క్విటోవా 3-6, 6-1, 7-5తో చెమటోడ్చి గెలిచింది. మరోవైపు వోజ్నియాకి 7-6 (7-2), 6-1తో కొలిన్స్‌ (అమెరికా)పై విజయం సాధించింది. కీస్‌ (అమెరికా), వాండ్‌వె (అమెరికా), మకరోవా (రష్యా) తొలి రౌండ్లో గెలిచారు.

మాజీ ఛాంపియన్‌ జకోవిచ్‌ శుభారంభం

మాజీ ఛాంపియన్‌ జకోవిచ్‌ శుభారంభం చేశాడు. తొలి రౌండ్లో అతను 6-3, 6-4, 6-4తో దుత్రా సిల్వ (బ్రెజిల్‌)ను ఓడించాడు. మ్యాచ్‌ మొత్తంలో ఆరు ఏస్‌లు, 37 విన్నర్లు కొట్టిన నొవాక్‌.. ఆరుసార్లు ప్రత్యర్థి సర్వీసు బ్రేక్‌ చేశాడు. ఏడో డొమినిక్‌ థీమ్‌ (ఆస్ట్రియా) పెద్దగా కష్టపడకుండానే రెండోరౌండ్‌ చేరాడు. అతను 6-2, 6-4, 6-1తో ఇవాష్కా (బెలారస్‌)ను చిత్తు చేశాడు. డేవిడ్‌ ఫెర్రర్‌ (స్పెయిన్‌) తొలి రౌండ్లోనే ఓడిపోయాడు. అతను 6-3, 6-3, 6-7 (3-7), 6-7 (4-7), 5-7తో మునార (స్పెయిన్‌) చేతిలో పరాజయం చవిచూశాడు. జ్వెరెవ్‌ (జర్మనీ) ముందంజ వేశాడు.