ఆస్ట్రేలియన్ ఓపెన్: ఫెదరర్, జొకోవిచ్ ముందంజ.. ముగురుజా ఔట్

రోజర్‌ అలవోకగా... కష్టపడ్డ జొకోవిచ్

టైటిల్‌ ఫేవరెట్‌, డిఫెండింగ్‌ చాంపియన్‌ రోజర్‌ ఫెదరర్‌ మరో అడుగు ముందుకేశాడు. రెండో రౌండ్లో రోజర్‌ 6-4, 6-4, 7-6 (7-4)తో స్ట్రఫ్‌ (జర్మనీ)పై విజయం సాధించాడు. ఈ మ్యాచ్‌లో రోజర్‌.. 17 ఏస్‌లతో పాటు 36 విన్నర్లు కొట్టాడు. మూడుసార్లు ప్రత్యర్థి సర్వీస్‌ బ్రేక్‌ చేశాడు.

మరోవైపు 14వ సీడ్‌ జొకోవిచ్‌ (సెర్బియా) కాస్త కష్టపడి నెగ్గాడు. తీవ్రమైన ఎండ ఫిట్‌నె‌స్‌కు పరీక్షపెట్టిన వేళ తొలి సెట్‌ చేజార్చుకున్నా ఆ తర్వాత పుంజుకొని 4-6, 6-3, 6-1, 6-3 స్కోరుతో గేల్‌ మోన్‌ఫిల్స్‌ (ఫ్రాన్స్‌)పై నెగ్గి మూడోరౌండ్‌కు చేరాడు.

ఏడో సీడ్‌ గోఫిన్‌ (బెల్జియం) 6-1, 6-7 (5-7), 1-6, 6-7 (4-7)తో బెనిట్యూ (ఫ్రాన్స్‌) చేతిలో ఓడాడు. డెల్‌పొట్రో 6-4, 7-6 (7-4), 6-7, 6-4తో కచనోవ్‌ (కజక్‌స్థాన్‌)పై చెమటోడ్చి గెలవగా. డొమినిక్‌ థీమ్‌ (ఆస్ట్రియా) 6-7 (6-8), 3-6, 6-3, 6-2, 6-3తో కుద్లా (అమెరికా)పై కష్టపడి విజయం సాధించాడు.

మూడో రౌండ్‌కు షరపోవా, హలెప్

టాప్‌సీడ్‌ సిమోనా హలెప్‌ (రుమేనియా) 6-2, 6-2 స్కోరుతో బౌచర్డ్‌పై అలవోకగా నెగ్గి మూడో రౌండ్‌కు చేరుకుంది. రెండో రౌండ్లో హలెప్‌ 6-2, 6-2తో బౌచర్డ్‌ (కెనడా)ను ఓడించగా.. కెర్బర్‌ 6-4, 6-1తో వికిచ్‌ (క్రొయేషియా)ను చిత్తు చేసింది.

మరోవైపు రష్యా భామ మరియా షరపోవా 6-1, 7-6 (4) స్కోరుతో సెవస్టోవా (లాత్వియా)పై రెండో రౌండ్‌లో అలవోకగా నెగ్గింది. ఆరోసీడ్‌ ప్లిస్కోవా (చెక్‌ రిపబ్లిక్‌) 6-1, 6-1 స్కోరుతో హడడ్‌ మేయా (బ్రెజిల్‌)పై, 26వసీడ్‌ రద్వాన్‌స్కా (పోలెండ్‌) 2-6, 7-5, 6-3 స్కోరుతో సురెంకో (ఉక్రెయిన్‌)పై నెగ్గి మూడో రౌండ్‌లో ప్రవేశించారు.

ముగిసిన ముగురుజా పోరాటం

ముగురుజా (స్పెయిన్) పోరాటం రెండో రౌండ్‌కే ముగిసింది. తైవాన్‌కు చెందిన సీ సూ వీ పెద్దగా పేరున్న క్రీడాకారిణి కాదు. ఆస్ట్రేలియన్‌ ఓపెన్‌లో గతంలో నాలుగోరౌండ్‌ను కూడా దాటలేదు. అలాంటి ఈసారి సీ పెను సంచలనమే సృష్టించింది. వరల్డ్‌ ర్యాంకింగ్స్‌లో ఎక్కడో 88వ స్థానంలో ఉన్న ఆమె వరుస సెట్లలో 7-6 (1), 6-4 స్కోరుతో వింబుల్డన్‌ చాంపియన్‌ ముగురుజ (స్పెయిన్‌)ను చిత్తుచేసింది. ఈ మ్యాచ్‌లో 5 డబుల్‌ఫాల్ట్‌లతో పాటు నాలుగుసార్లు సర్వీసు కోల్పోయిన ముగురుజా మ్యాచ్‌ను కూడా చేజార్చుకుంది.

వావ్రింకాకు షాక్‌

2014 ఆస్ట్రేలియన్ ఓపెన్ విజేత స్టాన్‌ వావ్రింకా రెండోరౌండ్‌లో ఇంటిదారి పట్టాడు. అమెరికాకు చెందిన అన్‌సీడెడ్‌ సాండ్‌గ్రెన్‌ 6-2, 6-1, 6-4 స్కోరుతో వరుస సెట్లలో వావ్రింకాను షాక్‌కు గురిచేశాడు. మరో అన్‌సీడెడ్‌ బెనెట్యూ (ఫ్రాన్స్‌) 1-6, 7-6 (5), 6-1, 7-6 (4) స్కోరు తో ఏడోసీడ్‌ గొఫిన్‌ (బెల్జియం)ను కంగుతినిపించాడు.