హైదరాబాద్: హైదరాబాద్ టెన్నిస్ సంచలనం సానియా మీర్జా ఇంటి వద్ద మరో యువకుడు గురువారం వీరంగం సృష్టించాడు. తాను ఐదేళ్లుగా సానియాను ప్రేమిస్తున్నానని, సానియాను తనకిచ్చి పెళ్లి చేయాలని అంటూ అతను సానియా ఇంటి వద్ద గొడవకు దిగాడు. ఉత్తరప్రదేశ్ కు చెందిన యాదవ్ సింగ్ అనే యువకుడిపై సానియా తండ్రి పోలీసులకు ఫిర్యాదు చేశాడు. దీంతో పోలీసులు అతన్ని అదుపులోకి తీసుకున్నారు. కేరళకు చెందిన అశ్రఫ్ అనే యువకుడు బుధవారం సానియా ఇంటి ముందు గొడవ సృష్టించి జైలు పాలయ్యాడు. అతను ప్రస్తుతం చంచల్ గుడా జైల్లో ఉన్నాడు. ఈ సంఘటన మరిచిపోక ముందే మరో యువకుడు గొడవ చేయడం సానియా కుటుంబ సభ్యులను ఇబ్బందులకు గురిచేస్తోంది. కాగా, సానియా నిశ్చితార్థం శుక్రవారం జరగనుంది. నగరానికే చెందిన సోహ్రాబ్ మీర్జాతో ఆమెకు నిశ్చితార్థం జరుగుతోంది.