ఆస్ట్రేలియన్‌ ఓపెన్‌ ఆఖరి టోర్నీ: కన్నీళ్లతో టెన్నిస్‌కు ముర్రే వీడ్కోలు

శ్రద్ధ పెట్టలేకపోతున్నా

"అందుకే శిక్షణలో కానీ టోర్నీల్లో కానీ పాల్గొనలేకపోతున్నా. ఏదోలా ఓర్చుకుంటూ కొంత వరకు ఆడగలనేమో. కానీ అంత సహనంతో బాధను భరిస్తూ ప్రాక్టీస్‌లో గానీ పోటీల్లో గానీ శ్రద్ధ పెట్టలేకపోతున్నా. చివరిగా వింబుల్డన్‌ టోర్నీలోనే ఆడా. ఆ టోర్నీతోనే కెరీర్‌ ముగిద్దామనుకున్నా. కానీ అక్కడ వరకు ఆటను కొనసాగించే పరిస్థితి లేదు. కాబట్టి ఇదే నా ఆఖరి టోర్నీ కావచ్చు" అని ముర్రే ఉద్వేగంగా పేర్కొన్నాడు.

మూడు గ్రాండ్‌స్లామ్‌ టైటిళ్లు నెగ్గిన ముర్రే

ఆండీ ముర్రే తన కెరీర్‌లో మూడు గ్రాండ్‌స్లామ్‌ టైటిళ్లు నెగ్గాడు. 1936లో ఫ్రెడ్‌ పెర్రీ వింబుల్డన్‌ గెలిచిన తర్వాత బ్రిటన్‌ అభిమానులు మళ్లీ టైటిల్‌ సాధించే తమ దేశపు ఆటగాడి కోసం కళ్లు కాయలు కాచేలా ఎదురు చూశారు. ఎట్టకేలకు 2013లో సొంతగడ్డపై వింబు ల్డన్‌ గెలిచి ముర్రే 77 ఏళ్ల కల నెరవేర్చాడు.

ఏకైక ఆటగాడు

2012లో యుఎస్‌ ఓపెన్‌ గెలిచిన ముర్రే.. మరో మూడేళ్లకు 2016లో వింబుల్డన్‌తో పాటు ఫ్రెంచ్‌ ఓపెన్‌నూ కైవసం చేసుకున్నాడు. అంతేకాదు... వరుసగా రెండు ఒలింపిక్స్‌లలో (2012, 2016) అతను స్వర్ణ నెగ్గి ఈ ఘనత సాధించిన ఏకైక ఆటగాడిగా నిలిచాడు. 2016 నవంబర్‌ 7 నుంచి వరుసగా 37 వారాల పాటు వరల్డ్‌ నంబర్‌వన్‌గా కొనసాగాడు.

గాయాలతో కనుమరుగు

ఆ తర్వాత గాయాలతో కనుమరుగైన ముర్రే.. మళ్లీ గ్రాండ్‌స్లామ్‌ టైటిళ్లు సాధించలేకపోయాడు. 2018లో యుఎస్‌ ఓపెన్లో మాత్రమే పాల్గొన్న ముర్రే... రెండో రౌండ్లోనే ఇంటిదారి పట్టాడు. ఇక, ఆస్ట్రేలియన్‌ ఓపెన్లో ఏకంగా ఐదుసార్లు ఫైనల్‌ చేరినా టైటిల్‌ గెలవలేకపోయాడు. ముర్రే ఖాతాలో మొత్తం 45 ఏటీపీ టైటిల్స్‌ ఉన్నాయి.