శ్రీశాంత్‌కు మొండిచేయి, పియూష్ చావ్లాకు చాన్స్: ధోనీ ఆలోచన

బెంగళూరు: తుది జట్టు కూర్పు కోసం భారత క్రికెట్ జట్టు కెప్టెన్ మహేంద్ర సింగ్ ధోనీకి బోలెడు ప్రత్యామ్నాయాలున్నాయి. బంగ్లాదేశ్‌పై తొలి మ్యాచులో సత్తా చూపిన భారత జట్టు ఆత్మవిశ్వాసంతో ఉంది. ఈ నెల 27వ తేదీన బెంగళూర్‌లోని చిన్నస్వామి స్టేడియంలో జరిగే మ్యాచు కోసం భారత జట్టు సిద్దమవుతోంది. ఇంగ్లండుతో మ్యాచులో జట్టు తుది కూర్పుపై కూడా ఆలోచన సాగుతోంది. జట్టు మేనేజ్‌మెంట్ ఆలోచన ఏ విధంగా సాగుతోందనే విషయం నెట్ ప్రాక్టీస్‌ను పరిశీలిస్తే ఇట్లే అర్థమవుతుంది. బంగ్లాదేశ్‌తో జరిగిన మ్యాచుకు బౌలర్ ఆశిష్ నెహ్రా దూరంగా ఉన్నాడు. అతను ఫిజియో సలహాలు తీసుకుంటూ బిజీగా ఉన్నాడు. నెట్‌కు మొదటి రెండు రోజులు కూడా దూరంగానే ఉన్నాడు. దీన్ని బట్టి ఆశిష్ నెహ్రా ఇంగ్లండుతో జరిగే మ్యాచులో ఆడే అవకాశాలు లేవని అర్థమవుతోంది.

బంగ్లాదేశ్‌తో జరిగిన మ్యాచులో శ్రీశాంత్ ఆట తీరు అసంతృప్తి కలిగించినట్లు చెబుతున్నారు. ఇంగ్లండుతో జరిగే మ్యాచులో అతను ఆడే అవకాశాలు తక్కువే. అతని స్థానంలో స్పిన్నర్ పియూష్ చావ్లాను ఆడించే అవకాశాలున్నాయి. అంటే, భారత జట్టు ఇద్దరు ఫుల్ టైమ్ స్పిన్నర్లతో భారత జట్టు మైదానంలోకి దిగే అవకాశాలున్నాయి. ఈ మార్పుపై కెప్టెన్ ధోనీ ఎక్కువగా ఆలోచించాల్సిన అవసరం లేకుండా పోయింది. చిన్నస్వామి స్టేడియంలో ఫిబ్రవరి 13వ తేదీన ఆస్ట్రేలియాతో జరిగిన వార్మప్ మ్యాచులో చావ్లా అద్భుతమైన ప్రదర్శన చేశాడు. ఆస్టేలియాపై భారత విజయానికి అతనే కారకుడయ్యాడు. అందువల్ల శ్రీశాంత్ స్థానంలో చావ్లాను తీసుకునే అవకశాలే ఎక్కువగా ఉన్నాయి. అయితే, రెండు వారాల క్రితం చావ్లాకు సహకరించిన చిన్న స్వామి స్టేడియం వచ్చే ఆదివారం సహకరిస్తుందా అనేది చూడాల్సి ఉంది.

నెట్‌లో చావ్లా ప్రధానంగా కనిపించడాన్ని బట్టి చూస్తే అతను ఆడే అవకాశాలు ఎక్కువగా ఉన్నాయి. మరో విషయం కూడా చావ్లాకు కలిసి వస్తోంది. స్పిన్‌ను ఎదుర్కోవడంలో అస్ట్రేలియన్ల కన్నా ఇంగ్లండు బ్యాట్స్‌మెన్ బలహీనులు. స్పన్ ఎదుర్కోవడంలో ఇంగ్లండు బ్యాట్స్‌మెన్ బలహీనతలను దృష్టిలో పెట్టుకుని కూడా ధోనీ చావ్లాకు అవకాశం కల్పించే అవకాశం ఉంది.