వరల్డ్ కప్: 27 పరుగుల ఆధిక్యంతో ఐర్లాండ్‌పై నెగ్గిన బంగ్లాదేశ్

ఢాకా: బ్యాట్స్‌మెన్ విఫలమైనప్పటికీ బౌలర్లు తమ బాధ్యతను నిర్వర్తించడంతో ప్రపంచకప్‌లో బంగ్లాదేశ్ బోణీ చేసింది. శుక్రవారం జరిగిన గ్రూప్ 'బి" లీగ్ మ్యాచ్‌లో బంగ్లాదేశ్ 27 పరుగుల ఆధిక్యంతో ఐర్లాండ్‌పై నెగ్గి ఈ టోర్నీలో తొలి విజయాన్ని నమోదు చేసుకుంది. టాస్ గెలిచి బ్యాటింగ్ ఎంచుకున్న బంగ్లాదేశ్ 49.2 ఓవర్లలో 205 పరుగులకు ఆలౌటైంది. 206 పరుగుల లక్ష్యంతో ఇన్నింగ్స్ ప్రారంభించిన ఐర్లాండ్ 45 ఓవర్లలో 178 పరుగులకు ఆలౌటైంది.

ఒకదశలో 151 పరుగులకు ఐదు వికెట్లతో లక్ష్యం దిశగా పయనిస్తున్న ఐర్లాండ్‌ను బంగ్లాదేశ్ పేసర్ షఫీయుల్ ఇస్లామ్ (4/21) దెబ్బతీశాడు. షఫీయుల్ ధాటికి ఐర్లాండ్ చివరి ఐదు వికెట్లు 27 పరుగుల తేడాతో పడిపోయాయి. ఆశ్చర్యకరంగా బంగ్లాదేశ్ ఓపెనర్ తమీమ్ ఇక్బాల్‌కు 'మ్యాన్ ఆఫ్ ది మ్యాచ్" అవార్డు లభించింది.