సౌరవ్ గంగూలీ కొచ్చి జట్టులో చేరుతారా, కూర్పు సరిగా లేకపోవడంతోనే?

కోల్‌ కత్తా: ఐపియల్ వేలంలో పది ఫ్రాంచైజీలు కూడా భారత క్రికెట్ జట్టు మాజీ కెప్టెన్ సౌరవ్ గంగూలీపై శీతకన్ను వేశాయి. ఆయనను వేలంలో కొనుగోలు చేసేందుకు ఏ ఫ్రాంచైజీ కూడా ముందుకు రాలేదు. ఐపియల్‌ లో అడుగు పెడుతున్న కొచ్చి జట్టు సౌరవ్ గంగూలీని తీసుకునే విషయంపై ఆలోచన చేస్తుందని సమాచారం. జట్టు కూర్పు పట్ల కొచ్చి జట్టు ఏ విధమైన శ్రద్ధ పెట్టలేదు. ఆ జట్టులో కాస్తా పేరున్న ఆటగాడు వివియస్ లక్ష్మణ్ ఒక్కడే. ఈ స్థితిలో గంగూలీని తీసుకునే ఆలోచనలో కొచ్చి యాజమాన్యం ఉన్నట్లు తెలుస్తోంది.

గంగూలీని తీసుకోవడానికి తమను అనుమతించాలని కొచ్చి ఫ్రాంచైజీ బిసిసిఐ పాలక మండలిని కోరినట్లు తెలుస్తోంది. ఇతర తొమ్మిది ఫ్రాంచైజీలు ఏ విధమైన అభ్యంతరాలు వ్యక్తం చేయకపోతేనే వేలంతో సంబంధం లేకుండా గంగూలీని జట్టులోకి తీసుకోవడానికి కొచ్చి ఫ్రాంచైజీకి అవకాశం దక్కుతుంది. తమకు ఏ విధమైన అభ్యంతరాలు లేవు కానీ ఇతర ఫ్రాంచైజీలు ఒప్పుకోవాల్సి ఉంటుందని బిసిసిఐ వర్గాలంటున్నాయి. ముంబై కెప్టెన్ వాసిం జాఫర్, పంజాబ్ బౌలర్ విఆర్వీ సింగ్, గంగూలీ మాత్రమే వేలంలో అమ్ముడుపోలేదు.