విశాఖ వన్డేను అడ్డుకుంటామంటున్న ప్రజాప్రతినిధులు: టికెట్ల రగడ

విశాఖపట్నం: భారత ఆస్ట్రేలియాల మధ్య జరిగే రెండో వన్డే మ్యాచ్ వివాదంలో చిక్కుకుంది. ఆంధ్ర క్రికెట్ అసోసియేషన్ (ఎసిఎ)పై విశాఖపట్నం ప్రజాప్రతినిధుల భగ్గుమంటున్నారు. విశాఖ వన్డేను అడ్డుకుంటామని హెచ్చరిస్తున్నారు. తమకు తగినన్ని టికెట్లు ఇవ్వకుండా మ్యాచ్ నిర్వాహకులు అవమానించారని వారు ఆరోపిస్తున్నారు. నిర్వాహకులు ప్రొటోకాల్ పాటించలేదని వారు విమర్శిస్తున్నారు. అయితే అధికారులు వారి విమర్శను ఖండిస్తున్నారు. తాము ప్రొటోకాల్ పాటించామని వారు చెబుతున్నారు. ఈ వివాదంపై మంత్రి బాలరాజు జాయింట్ కలెక్టర్, ఇతర అధికారులతో చర్చించారు. అయినా సమస్య పరిష్కారం కాలేదు. తమకు వేయి, ఆరు వందల రేట్లు గల టికెట్లు ఇవ్వాలని, వాటికి తాము డబ్బులు చెల్లిస్తామని విశాఖపట్నం కార్పొరేటర్లు డిమాండ్ చేస్తున్నారు. అయితే, ఇప్పటికే టికెట్లు అయిపోయాయని, తాము ఇవ్వలేమని మ్యా చ్ నిర్వాహకులు చెబుతున్నారు.

విశాఖపట్నం స్టేడియంలో 28,500 సీట్లున్నాయి. వాటిలో 16 వేల టికెట్లు అమ్మకానికి పెట్టారు. ఆ టికెట్లు ఎప్పుడో అమ్ముడయ్యాయి. మరో 12,500 టికెట్లు బిసిసిఐ చెప్పిన స్పాన్సర్లకు ఇవ్వడానికి పెట్టారు. కార్పొరేటర్లకు ఇవ్వాలంటే వీటి నుంచే ఇవ్వాల్సి ఉంటుంది. కానీ మ్యాచ్ నిర్వాహకులు అందుకు సిద్ధంగా లేరు. దీంతో వివాదం ముదురుతోంది.