బాక్సింగ్: విజేందర్ కు కాంస్యం

బీజింగ్: బీజింగ్ ఒలింపిక్స్ బాక్సింగ్ 75 కిలోల విభాగం సెమీ ఫైనల్లో భారత క్రీడాకారుడు విజేందర్ శుక్రవారంనాడు పోరాడి ఓడాడు. క్యూబా ఆటగాడు ఎమిలియో కొర్రియా బాయెక్స్ చేతిలో విజేందర్ 8-5 పాయింట్ల తేడాతో ఓటమి పాలయ్యాడు. దీంతో విజేందర్ కాంస్య పతకంతో సరిపెట్టుకోవాల్సి వచ్చింది. భారత బాక్సర్లలో ఒలింపిక్ క్రీడల్లో పతకం సాధించిన ఆటగాడిగా విజేందర్ రికార్డు స్థాపించాడు. దోహా ఆసియా క్రీడల్లో కూడా విజేందర్ కాంస్య పతకం సాధించాడు.

మొదటి రౌండులో విజేందర్ పై బాయెక్స్ 2-0తో ముందు నిలిచాడు. ఆ తర్వాత రెండో రౌండులో విజేందర్ కాస్తా విజృంభించి పాయింట్లను 3-4కు చేర్చాడు. మూడో రౌండులో విజేందర్ బాయెక్స్ పై పైచేయి సాధించలేకపోయాడు. ఎట్టకేలకు బాయెక్స్ 8-5 పాయింట్లతో విజేందర్ పై విజయం సాధించాడు. విజేందర్ కాంస్య పతకం దక్కించుకోవడంతో భారత్ కు ఇప్పటి వరకు బీజింగ్ ఒలింపిక్స్ లో మూడు పతకాలు వచ్చాయి.