బాధతో విలవిల్లాడాడు: విషాదంగా ముగిసిన బోల్ట్ చివరి పరుగు

ఉత్సాహంతో కనిపించిన బోల్ట్

తన ఆఖరి పరుగులో కూడా ఉసేన్ బోల్ట్ ఉత్సాహంతో కనిపించాడు. తన బృందంతో కలిసి ఒలింపిక్ స్టేడియంలోకి అడుగుపెట్టగానే వేలాది మంది అభిమానులు అతని నామస్మరణలో ఊగిపోయారు. చిరుమందహాసం చిందిస్తూనే.. ఫ్లయింగ్ కిస్‌లు ఇస్తూ రిలే కోసం సిద్ధమయ్యాడు. ఇక అంతా అనుకున్నట్లుగానే రిఫరీ ట్రిగ్గర్ నొక్కాడు. రేసు మొదలైంది. బ్యాటన్‌తో తొలి అంచె పరుగును ప్రారంభించిన మెక్లీయాడ్ అంచనాలను అందుకున్నాడు.

అపురూప క్షణం కోసం బోల్ట్ ఎదురుచూపు

రెండో అంచెలో ఫోర్ట్ పరుగును మొదలుపెట్టాడు. మూడో అంచెలో బ్లేక్ దూసుకొస్తున్నాడు.. ఓ అపురూప క్షణం కోసం బోల్ట్ చిరుతలా ఎదురుచూస్తున్నాడు. బోల్ట్‌కు బ్యాటన్‌ను అందించి బ్లేక్ తప్పుకున్నాడు. అలా అందుకున్నాడో లేదో బోల్ట్ ఒక్కో అడుగు లంఘిస్తుంటే.. ఒకటి, రెండు, మూడు లెక్కపెట్టడానికి కూడా సమయం లేనంత వేగం.. ఆఖరి ల్యాప్‌లో ప్రత్యర్థులను ఓరకంట చూస్తూ బోల్ట్ పరుగు తీస్తున్నాడు.

స్వర్ణం ఖాయమే అనుకుంటున్న తరుణంలో

దీంతో ఇక స్వర్ణం ఖాయమే అనుకుంటున్న తరుణంలో అనూహ్య సంఘటన చోటు చేసుకుంది. బోల్ట్‌ అడుగు తడబడింది. తొడ కండరాలు పట్టేసి.. బాధతో విలవిలలాడుతూ.. కుంటుతూ.. గెంతుతూ.. పరుగు ఆపేసి ట్రాక్‌పై కుప్పకూలిపోయాడు.

ట్రాక్‌పై కుప్పకూలిపోయాడు

అందరి దృష్టీ బోల్ట్‌ మీదే. ఎప్పుడూ రేసు అనంతరం నవ్వుతూ విచిత్ర విన్యాసాలు చేస్తూ సందడి చేసే బోల్ట్‌ తన చివరి రేసులో మాత్రం అలా ట్రాక్‌పై కూలబడిపోయి విలవిలలాడుతుంటే.. కన్నీళ్లు పెట్టుకుంటుంటే అభిమానుల గుండె బరువెక్కింది.

మైదానం నుంచి భారంగా నిష్క్రమించిన బోల్ట్

ఆ తర్వాత కొంచెం తేరుకుని లేచి నిలబడ్డ చప్పట్లతో అభినందనలు తెలుపుతున్న ప్రేక్షకులకు అభివాదం చేస్తూ భారంగా మైదానం నుంచి నిష్క్రమించాడు. బాధతో మెలికలు తిరిగిపోతున్న బోల్ట్‌ను చికిత్సకు తరలించేందుకు వైద్య సిబ్బంది వీల్‌ చైర్‌ తెచ్చారు. కానీ దానిపై వెళ్లేందుకు తిరస్కరించాడు. ట్రాక్‌పై తన ఆఖరి క్షణాలను మరింత ఆస్వాదించేందుకు అక్కడే ఉండిపోయాడు. అతడు కాలికండర గాయానికి లోనైనట్టు జమై కా టీమ్‌ డాక్టర్‌ వెల్లడించాడు.