రియో ఒలింపిక్స్‌లో కలకలం: కాల్పులు, మహిళ సహా ఇద్దరు మృతి

రియో డి జెనిరో: రియో ఒలింపిక్స్‌లో కలకలం చెలరేగింది. ఒలింపిక్స్ కోసం 85వేల మంది భద్రతా సిబ్బందిని ఏర్పాటు చేసినా అపశృతి దొర్లింది. ఆరంభ వేడుకలు ముగిసిన కొద్ది గంటల్లోనే మరకాన స్టేడియం ముందు ఓ వ్యక్తి తుపాకీ కాల్పుల్లో మృతి చెందగా, మరో ఒలింపిక్ స్టేడియానికి సమీపంలో ఓ మహిళను అగంతకులు కాల్చి చంపేశారు.

సైకిల్ పైన వస్తున్న వ్యక్తి పైన ఎవరో కాల్చడంతో అతను రోడ్డు పైనే కుప్పకూలిపోయాడు. మరో సంఘటనలో 51 ఏళ్ల మహిళ పైన ముగ్గురు దుండగులు దాడి చేశారు. ఈ సంఘటనలతో రియో భద్రత పైన అనుమానాలు కలుగుతున్నాయి. రియోలో క్రైమ్ రేటు ఎక్కువగా ఉంటుంది.

ప్రపంచంలో అత్యంత నేరమయ నగరాల్లో రియో పదకొండో స్థానంలో ఉంది. అక్కడ గత ఏడాది లక్ష జనాభాకు 35 మంది చొప్పున హత్యకు గురయ్యారు. బ్రెజిల్ దేశ రాజధానిలో దారి దోపడీలో 23.7 శాతం, హత్యలు 15.4 శాతం పెరిగాయని పోలీసు రికార్డులు చెబుతున్నాయి.

సైక్లింక్ ట్రాక్ వద్ద భారీ పేలుడు

రియో ఒలింపిక్స్‌ నిర్వహిస్తున్న సైక్లింగ్‌ ట్రాక్‌‌ వద్ద భారీ పేలుడు శబ్దం కలకలం రేపింది. వెంటనే స్పందించిన బాంబు నిర్వీర్య దళం సంఘటనా స్థలికి చేరుకొని పరిశీలించింది. ఈ ఘటనలో ఎవరూ గాయపడలేదు. శబ్దానికి గల కారణాలు తెలియరాలేదు. పేలుడు కారణంగా ఆటగాళ్లు పరుగులు పెట్టారు.