వినేష్ ఫోగాట్‌కు లైన్ క్లియర్: సుప్రీంకోర్టు గ్రీన్ సిగ్నల్!

భారత స్టార్ మహిళా రెజ్లర్ వినేష్ ఫోగాట్‌కు సుప్రీంకోర్టులో భారీ ఊరట లభించింది. ఈ ఏడాది జరగబోయే ప్రతిష్టాత్మక 'ఏషియన్ గేమ్స్ 2026' సెలక్షన్ ట్రయల్స్‌లో వినేష్ ఫోగాట్ పాల్గొనేందుకు సుప్రీంకోర్టు అనుమతి ఇచ్చింది. వినేష్‌ను ట్రయల్స్‌కు అనుమతిస్తూ ఢిల్లీ హైకోర్టు ఇచ్చిన తీర్పును సవాల్ చేస్తూ రెజ్లింగ్ ఫెడరేషన్ ఆఫ్ ఇండియా(డబ్ల్యూఎఫ్ఐ) దాఖలు చేసిన పిటిషన్‌పై విచారణ జరిపిన అత్యున్నత న్యాయస్థానం ఈ కీలక ఆదేశాలు జారీ చేసింది. ఈ విచారణ సందర్భంగా దేశానికి వినేష్ ఫోగాట్ చేసిన సేవలను, సాధించిన విజయాలను న్యాయస్థానం గౌరవించింది.

దేశమే అందరికంటే ముఖ్యం: వినేష్‌పై సుప్రీంకోర్టు కీలక కామెంట్స్
విచారణ సందర్భంగా సుప్రీంకోర్టు వినేష్ ఫోగాట్ క్రీడా విజయాలను ప్రశంసిస్తూ ఓ కీలక వ్యాఖ్య చేసింది. "ఈ స్థానంలో వేరే ఏ అథ్లెట్ ఉన్నా పరిస్థితి వేరుగా ఉండేది. కానీ వినేష్ ఫోగాట్ అంతర్జాతీయ వేదికలపై భారత్ గర్వపడేలా చేసింది" అని కోర్టు పేర్కొంది. అదే సమయంలో క్రీడా నియమాలను గుర్తు చేస్తూ.. "మీరు దేశం గర్వించదగ్గ అత్యుత్తమ అథ్లెట్ అనడంలో సందేహం లేదు. కానీ ఎప్పుడైనా, ఎవరికైనా దేశమే అందరికంటే ముఖ్యం" అని వినేష్‌కు సుప్రీంకోర్టు స్పష్టం చేసింది.

క్రీడా వ్యవహారాల్లో కోర్టుల జోక్యం సుప్రీంకోర్టు అసహనం
వినేష్ ఫోగాట్‌కు ఈ ఏషియన్ గేమ్స్ ట్రయల్స్‌లో పాల్గొనేందుకు ఉపశమనం కలిగించినప్పటికీ.. క్రీడా సమాఖ్యల అంతర్గత విషయాలలో, ఎంపిక ప్రక్రియలలో కోర్టులు పదే పదే జోక్యం చేసుకోవడంపై సుప్రీంకోర్టు తీవ్ర అసంతృప్తిని, ఆగ్రహాన్ని వ్యక్తం చేసింది. క్రీడా సంఘాల టెక్నికల్ రూల్స్, షెడ్యూల్స్ విషయంలో కోర్టులు అంత సులభంగా జోక్యం చేసుకోవడం వల్ల క్రీడా రంగంపై తీవ్ర ప్రభావం పడుతుందని న్యాయస్థానం ఆందోళన వ్యక్తం చేసింది."ఇవేమీ మెడికల్ కాలేజీ అడ్మిషన్లు కావు.. ఇవి జాతీయ, అంతర్జాతీయ స్థాయి క్రీడలు. కోర్టులు ఇలా ప్రతి విషయానికీ జోక్యం చేసుకుంటూ, క్రీడా సమాఖ్యలు ముందే ఖరారు చేసిన షెడ్యూళ్లను అస్తవ్యస్తం చేయడం ఏమాత్రం సరికాదు" అని జస్టిస్ పి.ఎస్. నరసింహ కీలక వ్యాఖ్యలు చేశారు.

అసలు వివాదం ఏమిటంటే?
ఆసియా క్రీడలు 2026 సెలక్షన్ ట్రయల్స్ షెడ్యూల్, నిబంధనలకు సంబంధించి రెజ్లింగ్ ఫెడరేషన్ ఆఫ్ ఇండియా, కొందరు రెజ్లర్ల మధ్య కొంతకాలంగా వివాదం నడుస్తోంది. దీనిపై వినేష్ ఫోగాట్ ఢిల్లీ హైకోర్టును ఆశ్రయించగా.. ఆమెకు అనుకూలంగా తీర్పునిస్తూ ట్రయల్స్‌లో పాల్గొనేందుకు హైకోర్టు అనుమతించింది. అయితే కోర్టుల జోక్యం వల్ల ఎంపిక ప్రక్రియ ఆలస్యమవుతుందని, క్రీడా షెడ్యూల్ దెబ్బతింటుందని భారత కుస్తీ సమాఖ్య(WFI) ఈ తీర్పును సుప్రీంకోర్టులో సవాల్ చేసింది. సుప్రీంకోర్టు వినేష్ ట్రాక్ రికార్డును బట్టి ఆమెకు ఈసారి మినహాయింపునిస్తూ ట్రయల్స్‌కు అనుమతించినప్పటికీ.. భవిష్యత్తులో క్రీడా విధానాలు, షెడ్యూలింగ్ విషయాల్లో క్రీడా సమాఖ్యల నిర్ణయాలకే ప్రాధాన్యత ఉంటుందని స్పష్టం చేస్తూ కోర్టులకు గట్టి సందేశాన్ని ఇచ్చింది.