రికార్డ్ సృష్టించిన బోల్ట్: 4X100మీ రిలేలో స్వర్ణం

లండన్: పరుగుల యంత్రం ఉసేన్ బోల్ట్ మరో రికార్డ్ సృష్టించాడు. 100, 200 మీటర్లలో వరుసగా బీజింగ్ ఒలింపిక్స్‌లో, తాజా లండన్ ఒలింపిక్స్‌లోనూ స్వర్ణం గెలుచుకున్న బోల్ట్... నేడు 4X100 మీ. రిలేలోనూ స్వర్ణం సాధించి వరుసగా రెండోసారి స్వర్ణం సాధించిన ఘనత సాధించాడు. దీంతో రెండు టైటిళ్లను నిలబెట్టుకుని తాను దిగ్గజ అథ్లెట్ అని ఉసేన్‌బోల్ట్ నిరూపించుకున్నాడు.

అంతకుముందే అతడిని అందరూ దిగ్గజం అని కొనియాడుతున్నారు. అయితే తాను రెండు టైటిళ్లను నిలబెట్టుకున్న తర్వాతే దిగ్గజ టైటిల్‌కు అర్హుడునని బోల్ట్ ముందే ప్రకటించాడు. అదే చేసి చూపించాడు. శనివారం అర్ధరాత్రి తర్వాత జరిగన ఫైనల్లో జమైకా జట్టు 36.84 సెకన్లలో రేసు పూర్తి చేసి ప్రపంచ రికార్డు నెలకొల్పింది. అమెరికా 37.04 సెకన్లలో పూర్తి చేసి రజతం నెగ్గింది.

కాగా ఈ జమైకా చిరుత బోల్ట్ గాయాల బారిన పడడం, ఒలింపిక్స్ ట్రయల్స్‌లో బ్లేక్ జోరు చూసిన తర్వాత 200 మీటర్ల పోటీ బోల్ట్‌కు కీలకం కాబోతోందని పదే పదే చెప్పారు. దానిని బోల్ట్ కూడా అంగీకరించాడు కూడా. తన కన్నా బ్లేక్ తీవ్రంగా కృషి చేశాడని ఈ సందర్భంగా బోల్ట్ చెప్పాడు.