లండన్ ఒలింపిక్స్‌లో ఈరోజు భారత్: ఆగస్టు 9 షెడ్యూల్

లండన్, ఆగస్టు 9: 'పరుగుల రాణి' పీటీ ఉష శిష్యురాలు టింటూ లూకా ఈరోజు జరగనున్న సెమీస్‌లో పోటీ పడుతుంది. ఆరు హీట్‌లలో టాప్-3లో నిలిచిన అథ్లెట్లతో పాటు మంచి టైమింగ్ నమోదు చేసిన మరో ఆరుగురు క్రీడాకారిణిలు సెమీస్‌లో పోటీపడతారు. టింటూ లూకా మహిళల 800 మీటర్ల రేసులో ఆమె సెమీస్‌కు అర్హత సాధించిన విషయం తెలిసిందే. క్వాలిఫయింగ్ హీట్-2లో బరిలోకి దిగిన లూకా 2 ని.01.75 సెకన్లలో రేసును పూర్తి చేసి మూడో స్థానంలో నిలిచింది. ఓవరాల్‌గా 13వ స్థానంలో ఉంది.

ఇక రెజ్లింగ్ ఈవెంట్ సోమవారమే మొదలైనప్పటికీ భారత రెజ్లర్లు పాల్గొననున్న బౌట్‌లు ఈరోజు నుండి ప్రారంభమవుతున్నాయి. తొలుత మహిళల ఫ్రీస్టయిల్ 55 కేజీల విభాగంలో 2010 కామన్వెల్త్ గేమ్స్ స్వర్ణ పతక విజేత గీత ఫోగట్ తన అదృష్టాన్ని పరీక్షించుకోనుంది. ఆ తర్వాత శుక్రవారం అమిత్ కుమార్ (55 కేజీలు)... నర్సింగ్ యాదవ్ (74 కేజీలు); శనివారం యోగేశ్వర్ దత్ (60 కేజీలు).... క్రీడల ఆఖరిరోజైన ఆదివారం సుశీల్ కుమార్ (66 కేజీలు) పోటీపడనున్నారు.

లండన్ ఒలింపిక్స్‌లో భారత అథ్లెట్లు పాల్గొనే గురువారం నాటి షెడ్యూల్:

అథ్లెటిక్స్:

మహిళల 800 మీటర్ల సెమీస్
టింటూ లూకా
భారత కాలమానం ప్రకారం రాత్రి 12 గంటలకు

మహిళల హైజంప్ క్వాలిఫయింగ్
సహానా కుమారి
భారత కాలమానం ప్రకారం మధ్యాహ్నం 2 గంటలకు

రెజ్లింగ్:

మహిళల 55 కేజీల ఫ్రీస్టయిల్ ప్రి క్వార్టర్ప్
గీత X తోన్యాలిన్ (కెనడా)
భారత కాలమానం ప్రకారం సాయంత్రం 5.55 గంటలకు

గమనిక: ఈఎస్‌పీఎన్, డీడీ స్పోర్ట్స్‌లో ప్రత్యక్ష ప్రసారం

తెలుగు వన్ఇండియా