ఫుట్‌బాల్: ఫిక్సింగ్ చేస్తే అమ్మాయిలు, లెబనీస్‌కు జైలు

సింగపూర్: క్రీడా రంగాల్లో ఎక్కడో ఒక మూల మ్యాచ్ ఫిక్సింగ్ అనే మాట వినిపిస్తోంది. ఇటీవల ఇండియన్ ప్రీమియర్ లీగ్(ఐపిఎల్)ను ఈ అంశం కుదిపేసింది. ఈ రగడ కొనసాగుతూనే ఉంది. మ్యాచ్ ఫిక్సింగ్ ఆరోపణలతో శ్రీశాంత్, అజిత్ చండిలా, అంకిత్ చవాన్‌లతో పాటు పలువురు బుకీలు కూడా అరెస్టయ్యారు. అందులో పలువురికి బెయిల్ కూడా లభించింది.

మ్యాచ్ ఫిక్సింగ్‌కు పాల్పడేందుకు పలువురు డబ్బులు, అమ్మాయిలను ఎరగా వేస్తుంటారు. ప్రధానంగా అమ్మాయిలను ఎరవేయడం ఎక్కువగా అవుతున్నట్లుగా కనిపిస్తోంది. ఐపిఎల్‌లోను పలువురికి అమ్మాయిలను ఎర వేసినట్లుగా వార్తలు వచ్చిన విషయం తెలిసిందే.

తాజాగా సింగపూర్ ఫుట్‌బాల్‌లో ఫిక్సింగ్ కుంభకోణం బయటపడింది. ఇది అక్కడ సంచలనం రేపింది. మ్యాచ్‌లు ఫిక్సింగ్ చేస్తే డబ్బులు మాత్రమే కాకుండా అమ్మాయిలనే ఆటగాళ్లకు ఎర వేశారట. ఈ బాగోతం బయట పడింది. సింగపూర్ కోర్టు లెబనాన్‌కు చెందిన ఇద్దరు సహాయక కోచ్‌లకు మూడు నెలల జైలు శిక్షను విధించింది.

ఈ నేరంలో రిఫరీకి కూడా భాగం ఉండటంతో అతనికి ఆరు నెలల జైలు శిక్షను విధించింది. అతను కూడా లెబనాన్‌కు చెందిన వాడే. ఆటగాళ్లకు సోమవారమే శిక్షను విధించిన కోర్టు, రిఫరీకి మంగళవారం విధించింది. ఇతను అమ్మాయిల కోసం సాకర్ గేమ్స్‌ను ఫిక్స్ చేసేందుకు ఒప్పుకున్నారట.