డాక్టర్ సైనానెహ్వాల్: రాజకీయాల్లోకి ములాయం వెల్‌కం

లక్నో: భారత స్టార్ షట్లర్ సైనా నెహ్వాల్, ఏస్ షూటర్ గగన్ నారంగ్‌లకు ఉత్తర ప్రదేశ్‌లోని మంగళయతన్ విశ్వవిద్యాలయం గౌరవ డాక్టరేట్‌లను శనివారం ప్రదానం చేసింది. లండన్ ఒలింపిక్స్ విజేతలకు ఈ విశ్వవిద్యాలయం గౌరవ డాక్టరెట్‌లను ఇచ్చింది. సైనా, గగన్‌లతో పాటు ఈ గౌరవ డాక్టరెట్‌లను తీసుకున్న వారిలో ప్రముఖ బాక్సర్ మేరీ కోమ్, షూటర్ విజయ్ కుమార్, రెజ్లర్లు సుశీల్ కుమార్, యోగేశ్వర్ దత్‌లు ఉన్నారు.

శనివారం విశ్వవిద్యాలయం స్నాతకోత్సవంలో వీరికి ఉత్తర ప్రదేశ్ మాజీ ముఖ్యమంత్రి, సమాజ్ వాది పార్టీ చీఫ్ ములాయం సింగ్ యాదవ్ అందజేశారు. కాగా ఈ గౌరవ డాక్టరేట్‌ల పట్ల వీటిని అందుకున్న వారు ఆనందాన్ని వ్యక్తం చేశారు. తన తల్లిదండ్రులు తనను మెడిసిన్ చదివించాలని భావించారని, భగవంతుడు మాత్రం తన కేరీర్‌ను ఇటు వైపు మరల్చారని సైనా నెహ్వాల్ ఈ సందర్భంగా చెప్పారు.

ఈ రోజు డాక్టరేట్‌ను అందుకోవడం తనకు చాలా సంతోషంగా ఉందని చెప్పారు. డాక్టరేట్ల ప్రదానం అనంతరం ములాయం సింగ్ యాదవ్ మాట్లాడుతూ.. దేశాన్ని సమర్థవంతంగా ముందుకు నడిపేందుకు ఆటగాళ్లు కూడా రాజకీయాల్లోకి రావాలని సూచించారు. ఆటగాళ్లకు ఉంటే చరిష్మా ఉపయోగించుకొని వారు రాజకీయాల్లోకి వచ్చి ఎన్నికల్లో పోటీ చేసి ప్రజలకు మంచి చేయాలని ఆయన విజ్ఞప్తి చేశారు.