లండన్ ఒలింపిక్స్: భారత ఆటగాడు వికాస్‌కు షాక్

లండన్: ఒలింపిక్స్ బాక్సింగ్ విభాగంలో తలపడుతున్న భారత క్రీడాకారుడు వికాస్ కృష్ణన్‌కు షాక్ తగిలింది. ప్రీ క్వార్టర్ ఫైనల్లో గెలిచి ఫైనల్స్‌కు చేరుకున్న ఆనందం ఎంతో సేపు నిలువలేదు. ప్రత్యర్థి జట్టు అమెరికా ఫిర్యాదుతో బాక్సింగ్ అసోసియేషన్ ప్రీక్వార్టర్ ఫైనల్స్ ఫలితాలను తిరిగి సమీక్షించింది. ఈ సమీక్ష అనంతరం అమెరికా క్రీడాకారుడికి అనుకూలంగా ఫలితాన్ని ప్రకటించింది. దీంతో వికాస్ కృష్ణన్ ఒలింపిక్స్ నుంచి నిష్క్రమించాల్సి వచ్చింది.

ఉత్కంఠభరితమైన పోరులో 20 ఏళ్ల భారత ఆటగాడు వికాస్ ఎర్రోల్ స్పెన్స్‌పై గత రాత్రి జరిగిన పోటీలో విజయం సాధించినట్లు ప్రకటించారు. మూడో రౌండ్‌లోనే వికాస్ 9 హోల్డింగ్ ఫౌల్స్ చేశాడని, రెఫరీ ఒక హెచ్చరిక మాత్రమే చేశాడని తన కాంపిటీషన్ జ్యూరీ సమీక్ష జరిపిన తర్వాత ఎఐబిఎ ప్రకటించింది.

స్పెన్స్‌కు తమ నిర్ధారణల అనంతరం జ్యూరీ సభ్యులు నాలుగు పాయింట్లు ఇచ్చారని, దీంతో అతను విజయం సాధించాడని ప్రకటించింది. అమెరికా బాక్సర్ అడ్డు రావడంతో రెఫరీ వికాస్ తప్పిదాన్ని గమనించలేకపోయాడని చెప్పింది.

అమెరికా ఆటగాడికి నాలుగు పాయింట్లు రావాల్సి ఉందని, దాంతో అతను విజయం సాధిస్తాడని చెప్పింది. స్పెన్స్ ఫిర్యాదుతో సమీక్ష చేపట్టి, అతన్ని విజేతగా ప్రకటించినట్లు సంఘం తెలిపింది. విజేందర్ తర్వాత వికాస్‌కు గెలుపు అవకాశాలున్నాయని ఆశించారు.