లండన్ ఒలింపిక్స్: హంగులూ, ఆర్భాటాలూ

లండన్: 26 క్రీడాంశాల్లో 302 ఈవెంట్లు.. 204 దేశాల నుంచి 10,500 మంది అథ్లె ట్లు.. లండన్ ఒలింపిక్స్‌లో జరగనున్న పోటీలు, పాల్గొంటున్న క్రీడాకారుల వివరాలివి. ఈ మెగా ఈవెంట్‌కు ఆతిథ్యమివ్వాలంటే వేదికలూ అదే స్థాయిలో ఉండాల్సిందే. 2012 గేమ్స్‌కు దాదాపు 80 వేల కోట్ల రూపాయలు ఖర్చు చేయగా.. వేదిలక నిర్మాణానికే భారీ వ్యయమైంది. వేదికల నిర్మాణం కోసం మొత్తం రెండు లక్షల మంది పనిచేశారు.

అంతర్జాతీయ స్థాయి ప్రమాణాలు, ఆధునిక వసతులతో ఇంగ్లండ్‌లో 34 వేదికలను పోటీలకు సిద్ధం చేశారు. కొన్నింటిని కొత్తగా నిర్మించగా, మరికొన్నింటిని ఆధునీకరించారు. ప్రధాన వేదిక ఒలింపిక్ స్టేడియాన్ని సరికొత్త హంగులతో అందంగా తీర్చిదిద్దారు. ఆరంభ, ముగింపు వేడుకలకు ఈ వేదికే ఆతిథ్యమివ్వనుంది. ఇందులో 80 వేల మంది ప్రత్యక్షంగా తిలకించే అవకాశం ఉండగా.. ప్రపంచ వ్యాప్తంగా వంద కోట్లకు పైగా టీవీల ద్వారా ఈ వేడుకలను వీక్షిస్తారని అంచనా. ఒలింపిక్స్ ఆరంభం కాకముందే ఈ స్టేడియం కోట్లాది క్రీడాభిమానులను ఆకర్షిస్తోంది. ఒలింపిక్ స్టేడియం విశేషాల గురించి తెలుసుకుందాం..

- ఈ ప్రధాన స్టేడియం నిర్మాణానికి 4650 కోట్ల రూపాయల వ్యయమైంది.

- 2008 మేలో నిర్మాణం పనులు ప్రారంభించి 2011 మే నాటికి పూర్తి చేశారు.

- వేదిక స్థలం కోసం 30 బిల్డింగ్‌లను నేలమట్టం చేశారు.

- నిర్మాణంలో పదివేల టన్నుల స్టీల్‌ను వాడారు.

- సీటింగ్ కెపాసిటీ 80 వేలు. వీటిలో 55 వేల సీట్లను తాత్కాలికంగా ఏర్పాటు చేశారు.

- ఇందులో మొత్తం 700 గదులు ఉన్నాయి.

- ఈ వేదిక ఒలింపిక్ పార్క్‌కు దక్షిణం వైపు ఉంటుంది.

- ఆరంభ (27న), ముగింపు వేడుకలకు ఒలింపిక్ స్టేడియం ఆతిథ్యమివ్వనుంది.

- ఈ వేదికలోనే అథ్లెటిక్స్ పోటీలు (ఆగస్టు 3 నుంచి 12 వరకు) నిర్వహించనున్నారు.

- లండన్‌లోని స్ట్రాట్‌ఫోర్డ్, వెస్ట్ హామ్ రైల్వే స్టేషన్ల (అండర్‌గ్రౌండ్) నుంచి ఈ వేదికకు చేరుకోవచ్చు.

- రోడ్డు మార్గాన ఐదు బ్రిడ్జిల గుండా ఇక్కడికి వెళ్లవచ్చు.

- పోటీల అనంతరం ఈ స్టేడియాన్ని సొంతం చేసుకునేలా వెస్ట్ హామ్ చాంపియన్‌షిప్ క్లబ్ మొదట ఒప్పందం కుదుర్చుకుంది. అనంతరం న్యాయపరమైన చిక్కులు రావడంతో ఒలింపిక్ పార్క్ లెగసీ కమిటీ ఒప్పందాన్ని రద్దుచేసింది. ఒలింపిక్స్ ముగిసిన తర్వాత క్రీడా వేదికగా కొనసాగిస్తారు.