పరుగుల రాణి పీటీ ఉషగా ప్రియాంక చోప్రా?

పీటీ ఉషగా ప్రియాంక చోప్రా?

జూన్ ఆర్(తమిళం), మ్యాడ్ డాడ్ (మళయాళం) చిత్రాలతో మంచి దర్శకురాలిగా గుర్తింపు తెచ్చుకున్న రేవతి వర్మ ఈ సినిమాకు డైరెక్షన్ చేయనున్నారు. ఇంతకుముందు ‘మేరీకోమ్‌' సినిమాలో ప్రధాన పాత్ర పోషించిన బాలీవుడ్ స్టార్‌ హీరోయిన్‌ ప్రియాంక చోప్రాను ఉషగా చూపించాలని చిత్ర బృందం భావిస్తోందట.

రెహమాన్‌ సంగీతం

ప్రస్తుతం ఆమెతో చర్చలు జరుగుతున్నాయి. దాదాపు రూ.100 కోట్ల బడ్జెట్‌తో నిర్మించే ఈ చిత్రానికి ఆస్కార్ అవార్డు గ్రహీత రెహమాన్‌ సంగీతం సమకూర్చే అవకాశాలున్నాయి. కేవలం హిందీలోనే కాకుండా తెలుగు, తమిళం సహా మరికొన్ని భాషల్లోనూ ఈ చిత్రాన్ని తెరకెక్కించే ప్రయత్నాలు జరుగుతున్నాయి.

ఉషను ఒప్పించడానికి కష్టపడాల్సి వచ్చింది

ఈ సినిమా కోసం పీటీ ఉషను ఒప్పించడానికి చాలా కష్టపడాల్సి వచ్చిందని రేవతి అన్నారు. ఈ బయోపిక్ కోసం ఆమెని ఎన్నిసార్లు కలిసినా.. ఆమె నుంచి మాత్రం ఇది సరైన సమయం కాదనే సమాధానం వచ్చిందని అన్నారు. అంతేకాదు భారత్ నుంచి అథ్లెటిక్స్‌లో ఎవరో ఒకరు గోల్డ్ మెడల్ సాధించిన తర్వాతే బయోపిక్ గురించి ఆలోచిద్దామని పీటీ ఉష చెప్పేవారని అన్నారు.

ఒలింపిక్‌ పతకాన్ని త్రుటిలో చేజార్చుకొన్న పీటీ ఉష

చివరకు ఎలాగోలా అతి కష్టమ్మీద ఆమెని ఒప్పించగలిగానని రేవతి చెప్పుకొచ్చారు. ఒకప్పుడు పరుగుల రాణిగా పేరుపొంది ఒలింపిక్‌ పతకాన్ని త్రుటిలో చేజార్చుకొన్న పీటీ ఉష జీవితం ఆధారంగా తెరకెక్కిస్తున్న సినిమా కావడంతో ఈ సినిమాపై అంచనాలు ఉండే అవకాశం ఎక్కువేనని అంటున్నారు.