రియో డీ జనీరో: రియో ఒలింపిక్స్ 2016లో బ్రెజిల్ ఫుట్ బాల్ జట్టు ఫైనల్కు దూసుకెళ్తోంది. బుధవారం జరిగిన సెమీ ఫైనల్ మ్యాచ్లో హొండురస్ జట్టును 6-0 తేడాతో చిత్తుగా ఓడించింది. నెయ్ మర్, గ్యాబ్రియల్ బ్రెస్ స్కోర్ చేయగా, మర్కియింన్హోస్, లౌన్ గర్సియా చెరో గోల్ చేసి తమ జట్టు విజయంలో కీలక పాత్ర పోషించారు.
బ్రెజిల్ గోల్డెన్ బాయ్, కెప్టెన్ నెయ్మర్ నేతృత్వంలో బ్రెజిల్ జట్టు ఈ విజయంలో ఫైనల్లోకి దూసుకెళ్లింది. దీంతో ఆగస్టు 20న జరగనున్న ఫైనల్ మ్యాచ్లో జర్మనీ జట్టుతో బ్రెజిల్ జట్టు తలపడనుంది.
కాగా, ఒలింపిక్స్ చరిత్రలోనే ఫాస్టెస్ట్ గోల్(15సెకన్లలో) చేసిన నెయ్ మర్ రికార్డు సృష్టించాడు. ఆ గోల్ నెయ్ మర్ శక్తి సామర్థ్యాలను మరోసారి రుజువు చేసింది. అంతేగాక, 90వ నిమిషంలో నెయ్ మర్ తన చివరి గోల్ చేశాడు.
కాగా, ఈ మ్యాచ్లో హొండురస్ జట్టు పూర్తిగా విఫలమై ఘోర పరాజయాన్ని చవిచూసింది. ఇది ఇలా ఉండగా, ఫైనల్లో జర్మనీని కూడా చిత్తు చేసి స్వర్ణాన్ని కైవసం చేసుకోవాలనే పట్టుదలతో కనిపిస్తోంది బ్రెజిల్.