మింగుడు పడడం కష్టమే: ఫ్రెంచ్ ఓపెన్‌లో ఓటమిపై సానియా మీర్జా

న్యూఢిల్లీ: ఓటమి మింగుడుపడడం కష్టమేనని ఫ్రెంచ్ ఓపెన్ పైనల్ మహిళా డబుల్స్‌లో ఓటమిపై హైదరాబాదీ టెన్నిస్ స్టార్ సానియా మీర్జా అన్నది. అయితే, రన్నరప్‌గా నిలిచినందుకు సంతృప్తిగానే ఉందని ఆమె చెప్పింది. కొద్ది నెలలుగా ఫిట్నెస్‌తో బాధపడుతున్న తనకు ఇది సంతృప్తినిచ్చే విషయమేనని అన్నది. ఓటమి ఓటమేనని, ముందు బాధ కలుగుతుందని, అయితే కెరీర్ పరంగా చూసుకుంటే సంతృప్తికరంగా ఉందని ఆమె వివరించింది.

ఎలెనా వెస్నినాతో జత కట్టిన సానియా మీర్జా ఫ్రెంచ్ ఓపెన్ మహిళా డబుల్స్‌లో ఫైనల్‌కు చేరుకుంది. అయితే, ఆండ్రియా హ్లావోకా, లూసీ హ్రదేకా జోడీపై సానియా మీర్జా జోడీ ఫైనల్‌లో 4-6, 3-6 స్కోరుతో ఓడిపోయింది. తమ ప్రత్యర్థి జోడీ తమ కన్నా బాగా పరిస్థితులకు సర్దుబాటు అయిందని సానియా అభిప్రాయపడింది.