ఫ్రెంచ్ ఓపెన్ నెగ్గిన చైనా అమ్మాయి: చరిత్ర సృష్టించిన నా లీ

పారిస్: అమెరికా, రష్యా, స్విట్జర్లాండ్, స్పెయిన్ ఇప్పటి వరకు టెన్నిస్ అంటే మనం విన్న పేర్లు. మొదటిసారి ఫ్రెంచ్ ఓపెన్‌ను నెగ్గి చరిత్ర సృష్టించిన అమ్మాయి నా లీ ఇప్పుడు చైనాను వాటి సరసన చేర్చింది. ఫ్రెంచ్ ఓపెన్ టైటిల్ నెగ్గిన తొలి చైనా క్రీడాకారిణిగా ప్రపంచ టెన్నిస్ చరిత్రలో తన పేరును సువర్ణాక్షరాలతో లిఖించుకుంది. కోట్లాది చైనా అభిమానుల కలలను సాకారం చేసింది. ఫైనల్లో డిఫెండింగ్ చాంపియన్ ఫ్రాన్సెస్కా షియవోన్‌ను మట్టికరిపించి కెరీర్‌లో మొట్టమొదటి గ్రాండ్‌స్లామ్ టైటిల్‌ను అందుకుంది. బలమైన ఫోర్‌హ్యాండ్ షాట్లతో అలరించిన నా లీ హోరాహోరీ తప్పదనుకున్న మ్యాచ్‌ను ఏకపక్షంగా మార్చేసింది. రోలాండ్ గారోస్‌లో ఇటలీ భామను చిత్తుచేసి మట్టిలో చాంపియన్‌గా నిలిచింది.


మహిళల సింగిల్స్ ఫైనల్లో నా లీ 6-4, 7-6 (0)తో ఇటలీకి చెందిన షియవోన్‌పై వరస సెట్లలో గెలుపొందింది. తొలిసెట్ ఆరంభంలోనే ప్రత్యర్థి సర్వీసును బ్రేక్ చేసే అవకాశాన్ని చేజార్చుకున్న నా లీ డిఫెండింగ్ చాంపియన్‌కు ముచ్చెమటలు పట్టించింది. అయితే ఐదోగేమ్‌లో లభించిన అవకాశాన్ని మాత్రం సద్వినియోగం చేసుకుని 3-2 ఆధిక్యంలోకి దూసుకెళ్లింది. అనంతరం తన సర్వీసులు నిలబెట్టుకుని 6-4తో తొలిసెట్‌ను సునాయాసంగా నెగ్గింది. కాగా, తొలిసెట్‌లో ప్రభావం చూపని షియవోన్ రెండో సెట్‌లో గట్టి పోటీనిచ్చింది. దీంతో పాయింట్లు సాధించేందుకు నా లీ కష్టపడాల్సి వచ్చింది.

హోరాహోరీగా సాగిన ఈ సెట్‌లో ఇద్దరూ చెరో బ్రేక్‌పాయింట్ సాధించి సమంగా నిలిచారు. దీంతో ఈ సెట్ టైబ్రేక్‌కు దారితీసింది. ఇక టైబ్రేక్‌లో రెచ్చిపోయిన నా లీ ప్రత్యర్థికి ఒక్కపాయింట్ కూడా దక్కనీయకుండా సెట్‌లో పాటు మ్యాచ్‌నూ గెలుపొంది ఫ్రెంచ్ ఓపెన్ చాంపియన్‌గా అవతరించింది.