WWEకి జాన్ సీనా గుడ్ బై.. ఓటమితో ముగిసిన కెరీర్!

ప్రపంచ రెజ్లింగ్ చరిత్రలో చెరగని ముద్ర వేసిన లెజెండరీ రెజ్లర్, 17 సార్లు ప్రపంచ ఛాంపియన్ జాన్ సీనా తన సుదీర్ఘ WWE కెరీర్‌కు వీడ్కోలు పలికారు. సాటర్డే నైట్స్ మెయిన్ ఈవెంట్‌లో గుంథర్ చేతిలో ట్యాప్ అవుట్ కావడంతో జాన్ సీనా వీడ్కోలు మ్యాచ్ నిరాశగా ముగిసింది. అరేనాలో అభిమానులు భావోద్వేగానికి లోనయ్యేలా.. దాదాపు 20 ఏళ్ల సుదీర్ఘ కాలంలో జాన్ సీనా ఒక మ్యాచ్‌లో ట్యాప్ అవుట్ కావడం ఇదే తొలిసారి కావడం గమనార్హం.

రింగ్ జనరల్‌పై పరాజయం: 20 ఏళ్ల రికార్డు బ్రేక్
జాన్ సీనా వీడ్కోలు మ్యాచ్‌ను గెలవాలని ప్రపంచవ్యాప్తంగా ఉన్న అభిమానులు ఆశించారు. కానీ, 'రింగ్ జనరల్'గా పేరుగాంచిన బలశాలి గుంథర్ ఆ అంచనాలను తారుమారు చేశాడు.జాన్ సీనా చివరి ప్రత్యర్థిగా నిలిచిన గుంథర్‌తో మ్యాచ్ అత్యంత కఠినంగా సాగింది. గుంథర్ తన పట్టుతో సీనాను బలంగా నిలువరించాడు. గుంథర్ బిగించిన బలాన్ని తట్టుకోలేక, చివరికి జాన్ సీనా ట్యాప్ అవుట్ చేయక తప్పలేదు. సుమారు రెండు దశాబ్దాల కాలంలో సీనా ఎప్పుడూ ట్యాప్ అవుట్ అయి పరాజయం పాలైన దాఖలాలు లేవు. జాన్ సీనా వీడ్కోలు మ్యాచ్ ఓటమితో ముగియడం, అందులోనూ ట్యాప్ అవుట్‌తో లొంగిపోవడం అరేనాలో ఉన్న వేలాది మంది అభిమానులను ఆశ్చర్యానికి మరియు నిరాశకు గురిచేసింది.

17 సార్లు ఛాంపియన్ పోరాటం
17 సార్లు వరల్డ్ ఛాంపియన్ జాన్ సీనా రింగ్‌లోకి అడుగుపెట్టినప్పుడు అరేనా మొత్తం ఆయన జైజయధ్వానాలతో దద్దరిల్లింది. మ్యాచ్ ప్రారంభం నుంచే గుంథర్ భీకర ఆధిపత్యాన్ని ప్రదర్శించాడు. గుంథర్ ఆధిపత్యం మధ్య కూడా, సీనా తన ప్రసిద్ధ కదలికలైన ఫైవ్-నకిల్ షఫిల్, ఎస్‌టిఎఫ్ (STF) ను ఉపయోగించి పుంజుకోవడానికి ప్రయత్నించారు. కానీ గుంథర్ మళ్లీ నియంత్రణ సాధించడంతో ప్రేక్షకులు తమ అరుపులతో జాన్ సీనాకు మద్దతు పలికారు.అభిమానుల మద్దతుతో సీనా 'సూపర్ సీనా' మోడ్‌లోకి వెళ్లి, మరో ఫైవ్-నకిల్ షఫిల్ చేసి, తన అస్త్రమైన ఏఏ (Attitude Adjustment) ను ప్రయోగించారు. జాన్ సీనా పిన్ చేసినా, గుంథర్ 'టూ కౌంట్' వద్ద శక్తిమంతంగా కిక్ అవుట్ చేసి తన బలాన్ని నిరూపించుకున్నాడు. గుంథర్ తన వ్యూహాన్ని మార్చి, జాన్ సీనాను స్లీపర్ హోల్డ్ తో దాదాపు అపస్మారక స్థితిలోకి తీసుకెళ్లాడు.

చివరి క్షణాల్లో ఉత్కంఠ
మ్యాచ్ చివరి ఘట్టంలో ఉత్కంఠ తారాస్థాయికి చేరింది. గుంథర్ రిస్క్ చేసి జాన్ సీనాను స్టీల్ మెట్లపైకి విసిరాడు. ఆ తర్వాత మెట్లను అనౌన్సర్ డెస్క్ దగ్గరకు తీసుకొచ్చాడు. అయితే గుంథర్ వేసిన ఎత్తుగడ అతనికే ప్రతికూలంగా మారింది. జాన్ సీనా అనౌన్సర్ టేబుల్ పైనుంచి గుంథర్‌కు ఏఏ ఇచ్చి మొమెంటమ్‌ను తిరిగి సాధించారు. జాన్ సీనా మరోసారి ఏఏ ప్రయోగించినా గుంథర్ బలమైన కిక్ అవుట్‌తో బయటపడ్డాడు. చివరగా గుంథర్ గట్టిగా స్లీపర్ లాక్ బిగించడంతో, జాన్ సీనా తన శక్తి మొత్తం కోల్పోయి, ట్యాప్ అవుట్ చేయక తప్పలేదు.

లెజెండరీ వీడ్కోలు వేడుక
ఓటమితో మ్యాచ్ ముగిసినప్పటికీ, ఆ రాత్రి జాన్ సీనా కెరీర్‌కు ఘనమైన వీడ్కోలు పలికిన వేదికగా నిలిచింది. జాన్ సీనా అత్యంత పెద్ద ప్రత్యర్థులుగా భావించే కర్ట్ యాంగిల్, మార్క్ హెన్రీ, రాబ్ వాన్ డ్యామ్ వంటి దిగ్గజాలు రింగ్ పక్కన నిలబడి వీడ్కోలు తెలిపారు. మిషెల్ మెక్‌కూల్, ట్రిష్ స్ట్రాటస్ వంటి హాల్ ఆఫ్ ఫేమర్స్ కూడా ఈ వేడుకకు హాజరయ్యారు. ది రాక్, కేన్ వంటి ఇతర WWE లెజెండ్‌లు వీడియో సందేశాల ద్వారా సీనాకు శుభాకాంక్షలు తెలిపారు. ఈ ఓటమితో జాన్ సీనా తన 20 ఏళ్ల సుదీర్ఘ WWE కెరీర్‌కు వీడ్కోలు పలికి, అభిమానుల హృదయాల్లో శాశ్వతంగా నిలిచిపోయారు.