చెస్ విశ్వవిజేత విశ్వనాథన్ అనంద్ ఇండియన్ కాడా?

న్యూఢిల్లీ: చెస్ విశ్వవిజేత విశ్వనాథన్ ఆనంద్ భారతీయుడు కాడా అనే అనుమానాలకు కేంద్ర ప్రభుత్వం తావిస్తోంది. విశ్వనాథన్ ఆనంద్ భారతీయుడు కాడనే అనుమానాలను కేంద్ర మానవ వనరుల మంత్రిత్వ శాఖ వ్యక్తం చేస్తోంది. దీంతో హైదరాబాదు కేంద్రీయ విశ్వవిద్యాలయం ఆయనకు ఇవ్వదలుచుకున్న గౌరవ డాక్టరేట్ కు బ్రేకులు వేసింది. హైదరాబాద్ కేంద్రీయ విశ్వవిద్యాలయం (హెచ్ సియు) ఆయనకు గౌరవ డాక్టరేట్ ఇవ్వాలని నిర్ణయించింది. అయితే, ఆనంద్ భారతీయుడు కాకపోవచ్చుననే అనుమానాలను కేంద్ర ప్రభుత్వం వ్యక్తం చేసింది.

తన భర్త నూటికి నూరు శాతం భారతీయుడని ఆయన భార్య అరుణా ఆనంద్ అంటోంది. ఈ మేరకు ఆమె కేంద్ర ప్రభుత్వానికి ఫిర్యాదు చేస్తూ ఓ లేఖ రాసింది. ఆనంద్ పాస్ పోర్టును కూడా ఆమె చూపిస్తోంది. కాగా, విశ్వనాథన్ ఆనంద్ కు స్పానిష్ పౌరసత్వం ఉంది. గౌరవ సూచకంగా ఆయన ఆ పౌరసత్వం లభించింది. ఈ కారణంగానే కేంద్ర ప్రభుత్వం ఆనంద్ పౌరసత్వం అనుమానాలు వ్యక్తం చేస్తున్నట్లు తెలుస్తోంది.

విశ్వనాథన్ ఆనంద్ భారతదేశంలోని తమిళనాడు రాష్టానికి చెందినవాడని అందరికీ తెలిసిన విషయమే. ఆయనకు పద్మ విభూషన్, రాజీవ్ ఖేల్ రత్న వంటి పలు సత్కారాలు లభించాయి. కేంద్ర ప్రభుత్వ అవార్డులు అవి. అటువంటప్పుడు హైదరాబడాద్ కేంద్రీయ విశ్వవిద్యాలయం గౌరవ డాక్టరేట్ కు అభ్యంతరాలేమిటో తెలియడం లేదు. అయినా ఇటువంటివాటిని హోం మంత్రిత్వ శాఖ పరిశీలించాల్సి ఉంటుంది గానీ మానవ వనరుల శాఖ అభ్యంతరపెట్టడమేమిటని ప్రశ్నిస్తున్నారు.