బెంగళూరు: ప్రపంచ కప్ పోటీల్లో ఐర్లాండ్ సంచలనం సృష్టించింది. అసమాన పోరాట పటిమ ప్రదర్శించి ఇంగ్లాండును అదరగొట్టింది. దిమ్మతిరిగే ఓటమిని ఇంగ్లాండుకు రుచి చూపించింది. కెవిన్ ఒబ్రైన్ 50 బంతుల్లో సెంచరీ సాధించి రికార్డు సృష్టించాడు. ఐర్లాండ్ జట్టు అత్యధిక లక్ష్యాన్ని ఛేదింది శ్రీలంక రికార్డును బద్దలు కొట్టింది. నామమాత్రంగా సాగుతుందని భావించిన మ్యాచ్ ఉత్కంఠభరితంగా మారి ఐర్లాండ్ ను హీరోను చేసింది. కెవిన్ ఓబ్రైన్ 63 బంతుల్లో 113 పరుగులు చేసి ఇంగ్లాండుకు చుక్కలు చూపించాడు. 1992 ప్రపంచకప్ లో జింబాబ్వేపై 313 పరుగుల లక్ష్యాన్ని ఛేదించి శ్రీలంక నెలకొల్పిన రికార్డును ఈ మ్యాచ్ లో ఐర్లాండ్ బద్దలు కొట్టింది. ఐర్లాండ్ 327 పరుగుల లక్ష్యాన్ని ఛేదించి ఆ రికార్డును తిరగరాసింది.ఓబ్రైన్ కు.. కుసాక్ (47; 58 బంతుల్లో 3X4, 1X6), మూనీ (33 నాటౌట్ ; 30 బంతుల్లో 6X4) తోడవడంతో ఐర్లాండ్ 49.1 ఓవర్లలో 7 వికెట్లు కోల్పోయి లక్ష్యాన్ని ఛేదించింది. ప్రపంచకప్ లో అతిపెద్ద ఛేదన ఇదే. ఓబ్రైన్ కు మ్యాన్ ఆఫ్ ద మ్యాచ్ అవార్డు లభించింది. మ్యాచ్ జరుగుతున్నంతసేపు బెంగళూరులో అభిమానులు ఐర్లాండ్ మద్దతుదారులుగా మారిపోయారు. 25 ఓవర్లలో ఐదు వికెట్లు కోల్పోయి 113 పరుగులు చేసిన ఐర్లాండ్ గెలుస్తుందని ఎవరూ అనుకోలేదు. కానీ కెవిన్ ఓబ్రైన్ రాకతో ఇంగ్లాండ్ తలరాతే మారిపోయింది. ఆ సమయంలో క్రీజులో అడుగుపెట్టినప్పటి నుంచి ఫోర్లు, సిక్స్ లతో రెచ్చిపోయాడు ఓబ్రైన్ . 31వ ఓవర్ కు ఐర్లాండ్ స్కోరు 167/5. 36వ ఓవర్లో పవర్ ప్లే ముగిసేసరికి 229/5. వికెట్లేమీ నష్టపోకుండా 62 పరుగులు. 30 బంతుల్లో అర్ధసెంచరీ చేసుకున్న ఓబ్రైన్ మరో 20 బంతుల్లో రెండో 50 సాధించాడు. 50 బంతుల్లో సెంచరీతో ప్రపంచకప్ లో అత్యంత వేగవంతమైన సెంచరీ కొట్టాడు. తర్వాత కాస్త జోరుతగ్గింది కానీ 49వ ఓవర్ వరకు నిలిచి జట్టుకు విజయాన్ని ఖాయం చేశాడు. విజయానికి మరో 11 పరుగుల దూరంలో రనౌటై ఓబ్రైన్ నిష్క్రమించాడు. ఓబ్రైన్ ఔటయ్యాక జాన్ స్టన్ (7 నాటౌట్ )తో కలిసి మూనీ (33) లక్ష్యాన్ని పూర్తిచేశాడు. #13;