సురేష్ కల్మాడీ కామన్‌వెల్త్ క్రీడల అక్రమాలతో హైదరాబాద్ లింక్

న్యూఢిల్లీ: కామన్‌వెల్త్ క్రీడల నిర్వాక కమిటీ మాజీ చైర్మన్ సురేష్ కల్మాడీ అక్రమాలతో హైదరాబాదుకు కూడా సంబంధం ఉన్నట్లు తెలుస్తోంది. క్వీన్స్ బాటన్ రిలే అక్రమాలు, టైమ్ స్కోరింగ్ అండ్ రిజల్ట్ సిస్టమ్ కాంట్రాక్టు వ్యవహారంలో సిబిఐ సోమవారం కల్మాడీని అరెస్టు చేసింది. టైమ్ స్కోరింగ్ ఎక్విప్‌మెంట్ కుంభకోణం దర్యాప్తులో సిబిఐ ముందడుగు వేసింది. కల్మాడి అనుబంధ కంపెనీగా భావిస్తున్న హైదరాబాద్‌కు చెందిన ఎకెఆర్ కన్‌స్ట్రక్షన్ కంపెనీకి ఈ కుంభకోణంలో పాత్ర ఉందని సిబిఐ అనుమానిస్తున్నారు.

టైమ్ స్కోరింగ్ ఎక్విప్‌మెంట్ కాంట్రాక్టు పొందిన స్విస్ టైమింగ్ కంపెనీ ఎకెఆర్ కన్‌స్ట్రక్షన్ కంపెనీ ఖాతాలో13 కోట్ల రూపాయలు జమ చేసింది. అయితే ఈ విషయాన్ని కొలిక్కి తేవడం సిబిఐకి అంత సులభంగా కనిపించడం లేదు. ఈ డీల్‌ ఆమోదం పొందడంలో పలువురు అధికారుల పాత్ర ఉంది. క్వీన్స్ బాటన్ రిలే కోసం వీడియో తెరలు, కార్లు సరఫరా చేయడానికి ఎఎం కార్స్ అండ్ ఫిల్మ్స్ కాంట్రాక్టు పొదింది. ఈ వ్యవహారంలో జరిగిన కుట్రలో నిర్వహాక కమిటీ అధికారులు టిఎస్ దర్బారీ, సంజయ్ మహీంద్రూ పాలు పంచుకున్నట్లు సిబిఐ అధికారులు అనుమానిస్తున్నారు.