ప్రపంచ కప్ జట్టు నుంచి తనను తప్పించడంపై హస్సీ షాక్

సిడ్నీ: క్రికెట్ ప్రపంచ కప్ జట్టు నుంచి తనను తప్పించడంపై ఆస్ట్రేలియా బ్యాట్స్‌మన్ మైక్ హస్సీ ఆశ్చర్యం వ్యక్తం చేశారు. గాయం నుంచి కోలుకోవడానికి సెలెక్టర్లు తనకు తగిన సమయం ఇవ్వలేదని ఆయన అన్నారు. ఇంగ్లాండుతో జిరగిన వన్డే సిరీస్ సందర్భంగా గత నెలలో గాయపడినప్పటికీ ఫిబ్రవరి 19 నుంచి ఏప్రిల్ 2వ తేదీ వరకు జరిగే ప్రపంచ కప్ జట్టులోకి హస్సీని తొలుత ఎంపిక చేశారు. అయితే, హస్సీని తప్పించి అతని స్థానంలో కల్లుమ్ ఫెర్గూసన్‌ను 15 మంది సభ్యుల జట్టులోకి తీసుకున్నారు.

తనను తప్పించడంపై తీవ్ర అసంతృప్తికి గురయ్యానని, షాక్ తిన్నానని హస్సీ మీడియా ప్రతినిధులతో అన్నారు. ఈ విషయాన్ని దిగమింగడం కష్టమేనని ఆయన అన్నారు. మిస్టర్ క్రికెట్‌గా పేరు పొందిన హస్సీ 151 వన్డేలు ఆడి 4,469 పరుగులు చేశారు. 2007లో ఆండ్ర్యూ సైమండ్స్‌కు కల్పించిన అవకాశాన్ని ఇప్పుడు తనకు కల్పించాల్సి ఉండిందని ఆయన అన్నారు.