హెచ్ సిఎలో మరోసారి చిచ్చు: కార్యదర్శి చలపతికి కష్టాలు

హైదరాబాద్‌: హైదరాబాద్‌ క్రికెట్‌ సంఘం (హెచ్‌సీఏ) కార్యదర్శి డీఎస్‌ చలపతి చుట్టూ ఉచ్చు బిగుస్తోందని ఓ ప్రముఖ తెలుగు దినపత్రిక వార్తాకథనం తెలుపుతోంది. ఆ పత్రిక వార్తాకథనం ప్రకారం - కేంద్ర ప్రభుత్వ రంగ సంస్థకు చెందిన రెండు జట్ల విషయంలో వ్యవహరించిన తీరు ఆయనను వివాదంలోకి నెట్టింది. హైదరాబాద్‌ టెలిఫోన్స్‌ క్రికెట్‌, టెలికాం క్రికెట్‌ క్లబ్‌లతో బీఎస్‌ఎన్‌ఎల్‌కు ఎలాంటి సంబంధం లేదని, అవి పూర్తిగా ప్రైవేటు క్లబ్‌లంటూ బీఎస్‌ఎన్‌ఎల్‌కు అక్టోబరు 22న చలపతి రాసిన లేఖపై హెచ్‌సీఏ అధ్యక్షుడు అర్షద్‌ ఆయూబ్‌ తీవ్రంగా స్పందించారు. హెచ్‌ సీఏ ఎగ్జిక్యూటివ్‌ కమిటీ దృష్టికి తీసుకురాకుండా, కార్యవర్గ సభ్యులను సంప్రదించకుండా, కార్యదర్శి సొంతంగా లేఖ రాయడాన్ని తప్పుబట్టారు.

ఇటీవల భారత్‌, న్యూజిలాండ్‌ జట్ల మధ్య టెస్టు మ్యాచ్‌ సందర్భంగా అనుబంధ క్లబ్‌ల కార్యదర్శులకు బ్లేజర్లు ఇవ్వాలని హెచ్‌సీఏ నిర్ణయించింది. బ్లేజర్లు తీసుకోవాల్సిందిగా క్లబ్ ‌ల ప్రతినిధులకు లేఖలు పంపింది. ఈ లేఖ ఏపీ టెలికాం (బీఎస్‌ఎన్‌ఎల్‌) క్రీడల అధికారికి అందింది. టెలిఫోన్‌, టెలికాం జట్ల తరఫున తమ నామినీకి బ్లేజర్లు ఇవ్వాల్సిందిగా ఆయన హెచ్‌సీఏకు సమాధానం రాశారు. దాంతోపాటు ఎవరి అనుమతితో టెలిఫోన్‌, టెలికాం జట్ల చిరునామాలు మార్చారో చెప్పాలని హెచ్‌సీఏను కోరారు. ఈ రెండు లేఖలకు బదులే చలపతి రాసిన ఉత్తరం. సదరు రెండు జట్లతో ఏపీ టెలికాంకు ఎలాంటి సంబంధం లేదని ఆ లేఖలో చలపతి స్పష్టం చేశారు.

నిజానికి టెలిఫోన్‌, టెలికాం రెండూ బీఎస్‌ఎన్‌ఎల్‌ సంస్థలే. గతంలో ఈ రెండూ విడివిడిగా ఉండేవి. విలీనంలో భాగంగా ఈ రెండూ కలిసి బీఎస్‌ఎన్‌ఎల్‌గా మారాయి. ఐతే ఈ రెండు సంస్థలకు ప్రతినిధులుగా వ్యవహరించిన కొందరు అనంతర కాలంలో వీటిని ప్రైవేటు క్లబ్‌లుగా నడిపించారు. సొంత చిరునామాలు పెట్టి బీఎస్‌ ఎన్‌ ఎల్ ‌కు ఎలాంటి సమాచారం లేకుండా చేశారు. చాలా ఏళ్ళుగా ఈ తతంగం నడుస్తున్నా బ్లేజర్ల లేఖ బీఎస్‌ఎన్‌ఎల్‌ అధికారికి అందడంతో విషయం వెలుగులోకి వచ్చింది.