ప్రపంచ నెం.9ను మట్టి కరిపించిన గురుసాయి దత్

న్యూఢిల్లీ: హాంకాంగ్ ఓపెన్ సూపర్ సిరీస్ బ్యాడ్మింటన్ టోర్నీలో ఆంధ్రప్రదేశ్ యువ షట్లర్ గురుసాయి దత్ సంచలనం సృష్టించాడు. టోర్నీలో క్వాలిఫయర్‌గా బరిలోకి దిగిన గురుసాయి రెండో రౌండ్లో ఏడోసీడ్ పెంగ్యూ డును ఓడించి క్వార్టర్స్‌కు చేరుకున్నాడు. ఏస్ షట్లర్ సైనా నెహ్వాల్‌తో పాటు అజయ్ జయరామ్ క్వార్టర్స్‌లో ప్రవేశించారు. మిక్స్‌డ్ డబుల్స్‌లో జ్వాల జోడీ సహా ఇతర భారత షట్లర్ల పోరాటం ముగిసింది. గురువారం జరిగిన పురుషుల సింగిల్స్ రెండో రౌండ్లో గురుసాయి 15-21, 21-7, 21-13 స్కోరుతో పెంగ్యూ డు (చైనా)పై విజయం సాధించాడు. 56 నిమిషాల పాటు సాగిన ఈ పోరులో గురుసాయి తొలి గేమ్ కోల్పోయినా ఆనక పుంజుకుని చైనా షట్లర్‌కు చుక్కలు చూపించాడు.

క్వార్టర్స్‌లో గురుసాయి రెండో సీడ్ లాంగ్ చెన్ (చైనా) ను ఎదుర్కోనున్నాడు. మరో మ్యాచ్‌లో జయరామ్ 21-16, 21-15తో మహమ్మద్ హఫీజ్ (మలేసియా)ను ఓడించాడు. మహిళల సింగిల్స్ రెండో రౌండ్లో నాలుగోసీడ్ సైనా 21-17, 21-17తో జీ యావో (నెదర్లాండ్స్)పై గెలుపొందింది. మహిళల డబుల్స్‌లో వెనుదిరిగిన జ్వాలకు మిక్స్‌డ్‌లోనూ నిరాశ ఎదురైంది. రెండో రౌండ్లో జ్వాల, దిజు జోడీ 18-21, 16-21తో చైనా జంట జిన్ మ, చెన్ జు చేతిలో ఓటమి చవిచూసింది. పురుషుల సింగిల్స్‌లో భారత షట్లర్లు అరవింద్ భట్, డబుల్స్‌లో రూపేష్ కుమార్, సనావే థామస్ జోడీ రెండో రౌండ్లో పరాజయం చెందారు.