దక్షిణాఫ్రికాను చిత్తు చేసిన ఇంగ్లాండ్

బార్బడోస్‌: టీ20 ప్రపంచకప్‌ లో ఇంగ్లాండ్‌ సూపర్‌-8లో వరుసగా రెండో విజయం సాధించింది. బ్యాటింగ్‌ లో కెవిన్‌ పీటర్సన్‌ (53; 33 బంతుల్లో 8X4, 1X6)..బౌలింగ్‌లో గ్రేమ్‌ స్వాన్‌ (3/24), సైడ్‌ బాటమ్‌ (3/23) చెలరేగడంతో శనివారం ఇంగ్లాండ్‌ 39 పరుగుల తేడాతో దక్షిణాఫ్రికాను చిత్తు చేసింది. 169 పరుగుల లక్ష్యంతో బరిలోకి దిగిన దక్షిణాఫ్రికా 19 ఓవర్లలో 129 పరుగులకే కుప్పకూలింది. డుమిని (39; 25 బంతుల్లో 2X4, 2X6) మినహా బ్యాట్స్‌మెన్‌ అంతా విఫలమయ్యారు.

అంతకుముందు మొదట బ్యాటింగ్‌ చేసిన ఇంగ్లాండ్‌..పీటర్సన్‌, కీస్వెటర్‌ (41; 42 బంతుల్లో 3X4, 2X6), మోర్గాన్‌ (21; 14 బంతుల్లో 3X4) మెరుపులు మెరిపించడంతో నిర్ణీత ఓవర్లలో 7 వికెట్లు కోల్పోయి 168 పరుగులు చేసింది. దక్షిణాఫ్రికా బౌలర్లలో బోథా 15 పరుగులే ఇచ్చి 2 వికెట్లు పడగొట్టాడు.