బెర్లిన్ మారథాన్‌: ప్రపంచ రికార్డు నెలకొల్పిన కెన్యా అథ్లెట్‌

హైదరాబాద్: బెర్లిన్ వేదికగా జరిగిన పురుషుల మారథాన్‌లో కెన్యా స్టార్‌ అథ్లెట్‌, రియో ఒలింపిక్‌ ఛాంపియన్ ఎలియుడ్‌ కిప్‌చోగె ప్రపంచ రికార్డుని నెలకొల్పాడు. ఆదివారం జరిగిన బెర్లిన్‌ మారథాన్‌లో 33 ఏళ్ల ఎలియుడ్‌ కిప్‌చోగె ఈ ఘనత సాధించాడు.

ఈ మారథాన్‌ రేసును 2 గంటల 1 నిమిషం 39 సెకన్లలో పూర్తి చేసి సరికొత్త ప్రపంచ రికార్డు సృష్టించాడు. రియో ఒలింపిక్స్‌లో పసిడి పతకం నెగ్గిన కిప్‌చోగె 42.195 కిలోమీటర్ల దూరాన్ని 2 గంటల ఒక నిమిషం 39 సెకన్లలో పూర్తి చేశాడు. ఫలితంగా మారథాన్ ఈవెంట్‌లో సరికొత్త రికార్డుని నెలకొల్పాడు.

2014లో బెర్లిన్‌ మారథాన్‌లోనే కెన్యాకు చెందిన డెన్నిస్‌ కిమెట్టో (2:02.57 సెకన్లు) నెలకొల్పిన ప్రపంచ రికార్డును కిప్‌చోగె బద్దలు కొట్టాడు. ఈ రేసులో తొలి మూడు స్థానాలను కెన్యా అథ్లెట్లే దక్కించుకోవడం విశేషం. కిప్రుటో అమోస్‌ (2:06.23 సె), కిప్‌సాంగ్‌ విల్సన్‌ (02:06. 48 సె) వరుసగా రెండు, మూడు స్థానాల్లో నిలిచారు.

ఎలియుడ్‌ కిప్‌చోగె ఇప్పటి వరకు పోటీపడ్డ 11 మారథాన్లలో పదింటిలో విజేతగా నిలిచాడు. కిప్‌చోగె 2004, 2008 ఒలింపిక్స్‌లో 5000 మీటర్ల పరుగులో కాంస్య, రజత పతకాలను సొంతం చేసుకున్న సంగతి తెలిసిందే.