మీడియాపై యువరాజ్ చిందులు

న్యూఢిల్లీ: తీవ్ర ఆగ్రహానికి, నిరాశకు గురైన క్రికెటర్ యువరాజ్ సింగ్ మీడియాపై శుక్రవారం చిందులేశాడు. తాను కింగ్స్ ఎలెవన్ పంజాబ్ జట్టు నుంచి తప్పుకుంటున్నట్లు వచ్చిన వార్తలను అతను ఖండించాడు. ఏ ఆటగాడు కూడా కావాలని సరిగా ఆడకపోవడం ఉండదని అన్నాడు. తనపై వచ్చిన వార్తను చూసి భయమేసిందని, అటువంటి వార్తను తాను ఇప్పటి వరకు చూడలేదని అతను అన్నాడు.

యువరాజ్ కు, జట్టు కో కన్వీనర్ నెస్ వాడియాకు మధ్య తీవ్ర విభేదాలు వచ్చినట్లు వార్తలు వచ్చాయి. యువరాజ్ ముంబై ఇండియన్స్ జట్టుకు మారుతాడని కూడా ఆ వార్తాకథనం సారాంశం. యువరాజ్ ఆట తీరు పట్ల బిసిసిఐ వద్ద నెస్ వాడియా తీవ్ర అసంతృప్తి వ్యక్తం చేసినట్లు కూడా వార్తలో వ్యాఖ్యానించారు. ఆ వార్త పూర్తిగా కల్పితమని, అటువంటి వార్తాకథనాలు వండే అధికారం మీడియాకు లేదని యువరాజ్ అన్నాడు.