ఢిల్లీ క్రికెట్: చల్లారని వివాదం

న్యూఢిల్లీ: ఢిల్లీ క్రికెట్ లో మొదలైన వివాదం ఇంకా చల్లారలేదు. ఢిల్లీ కీటగాళ్లు శుక్రవారం వరుసగా మూడో రోజు కూడా క్యాంపునకు డుమ్మా కొట్టారు. ఫిరోజ్ షా కోట్లా మైదానంలో జరుగుతున్న కండీషనింగ్ క్యాంపు మూడు రోజుల క్రితం ప్రారంభమైంది. ఢిల్లీ జిల్లా, క్రికెట్ అసోసియేషన్ లో అవినీతి, పక్షపాతం పెరిగిపోయిందని వీరేంద్ర సెహ్వాగ్ ఆరోపణలకు కీలకమైన ఢిల్లీ క్రికెటర్ల నుంచి మద్దతు లభించింది. శుక్రవారం క్యాంపునకు గైర్హాజరైన వారిలో గౌతం గంభీర్, ఇషాంత్ శర్మ ఉన్నారు.

కండీషనింగ్ క్యాంపునకు ఆటగాళ్లు రాకపోవడానికి అశాంతి కారణం కాదని, ఇతర కార్యక్రమాల వల్ల వారు రాలేకపోయారని క్యాంపు ప్రారంభమైన తొలి రోజు డిడిసిఎ ఉపాధ్యక్షుడు చేతన్ చౌహాన్ చెప్పారు. అయితే ఆయన మాటల్లో ఏ మాత్రం నిజంలేదని తేలిపోయింది. ఆటగాళ్ల తిరుగుబాటుకు మదన్ లాల్, బిషన్ సింగ్ బేడీ వంటి మాజీ క్రికెటర్ల మద్దతు కూడా లభిస్తోంది.