Commonwealth Games : వెయిట్‌లిఫ్టర్ జెరెమీ లాల్రినుంగాకు అదిరిపోయే వెల్‌కమ్ చెప్పిన మిజోరం ప్రజలు

200 బుల్లెట్ బైకులతో సవారీ

తనకు ఐజ్వాల్లో లభించిన స్వాగతానికి సంబంధించిన ఫోటోలను ట్విట్టర్లో జెరెమీ పంచుకున్నాడు. 'నాకు నా స్వస్థలంలో ఇంత సాదర స్వాగతం పలికినందుకు అందరికీ ధన్యవాదాలు తెలియజేస్తున్నాను. నేను మరింత కష్టపడి సాధన చేసి మన రాష్ట్రానికి, మన దేశానికి మరిన్ని అవార్డులు తెస్తాను.' అని పేర్కొన్నాడు. జెరెమీ లాల్రినుంగా ఓపెన్ టాప్ కారుపై తన చేతుల్లో త్రివర్ణ పతాకాన్ని ఊపుతూ ప్రజలకు అభివాదం తెలుపుతూ కన్పించాడు. అతన్ని ప్రజలు కేరింతలు కొడుతూ అభినందించారు. ఇక అతని కారుకు ముందు ఏకంగా 200 రాయల్ ఎన్‌ఫీల్డ్ బుల్లెట్ బైకులతో రైడర్స్ సవారీ నిర్వహించారు.

కామన్‌వెల్త్ గేమ్స్‌లో సరికొత్త రికార్డు

ఇక కామన్ వెల్త్ గేమ్స్‌లో 67కేజీల విభాగంలో జెరెమీ స్నాచ్ ఈవెంట్‌లో 140కిలోల బరువెత్తి కొత్త రికార్డు సృష్టించాడు. అతను క్లీన్ అండ్ జెర్క్ విభాగంలో మొత్తం 160కిలోలు ఎత్తాడు. ఇక టోటల్‌గా 300కిలోల గ్రాండ్ టోటల్‌తో స్వర్ణ పతకాన్ని అతను ఒడిసిపట్టాడు. 67కేజీల విభాగంలో కామన్ వెల్త్ గేమ్స్‌లో ఇది కొత్త రికార్డు. ఇకపోతే జెరెమీ తన చివరి ప్రయత్నంలో 165 కేజీలు ఎత్తే టైంలో కాస్త గాయపడ్డాడు. అయితే పెద్ద గాయమేమీ కాదు. అందువల్ల 165కేజీల లిఫ్టింగ్ పూర్తి చేయలేకపోయాడు

గత ఈవెంట్లోనూ గోల్డ్ మెడల్స్ ప్రదర్శన

మిజోరంలోని ఐజ్వాల్‌కు చెందిన 19ఏళ్ల యువకుడు అయిన జెరెమీ 2018 యూత్ ఒలింపిక్ గేమ్స్‌లో 62కిలోల ఈవెంట్‌లో స్వర్ణం సాధించాడు. గత సంవత్సరం కామన్వెల్త్ ఛాంపియన్‌షిప్‌లో 67కిలోల విభాగంలో అతను స్వర్ణం కూడా గెలుచుకున్నాడు. జాతీయ స్థాయి బాక్సర్ అయిన లాల్రినుంగా కుమారుడు జెరెమీ లాల్రిన్‌నుంగా. అతను తొలుత బాక్సింగ్ క్రీడ మీద మక్కువ చూపాడు. తర్వాత బాక్సింగ్ కాదని వెయిట్ లిఫ్టింగ్ వైపు తన ఫోకస్ మరల్చాడు. అందువల్ల వెయిట్ లిఫ్టింగ్లో ఇండియాకు మరో ఆశాకిరణంలా మారాడు.