షోయబ్ తో భేటీకి అజర్ సాక్షి: అయేషా

హైదరాబాద్: పాకిస్తాన్ క్రికెటర్ షోయబ్ మాలిక్, తన కలయికకు మాజీ క్రికెటర్, పార్లమెంటు సభ్యుడు మహ్మద్ అజరుద్దీన్ సాక్షి అని అయేషా సిద్దిఖి పోలీసులకు చెప్పినట్లు సమాచారం. తాను, షోయబ్ హైదరాబాదులోని తాజ్ కృష్ణాలో కలిసి ఉండగా అజర్, ఆయన భార్య సంగీత బిజలానీ చూశారని ఆమె చెప్పినట్లు తెలుస్తోంది. షోయబ్ ను ప్రశ్నించిన అనంతరం సోమవారంనాడు పోలీసులు అయేషా సిద్దిఖిని విచారించారు. పోలీసులకు ఆమె సాక్ష్యాలను సమర్పించినట్లు సమాచారం.

షోయబ్ మాలిక్, అయేషా పెళ్లి వివాదంలో తాము అన్ని పత్రాలను పరిశీలిస్తున్నామని రాష్ట్ర పోలీసు డైరెక్టర్ జనరల్ (డిజిపి) గిరీష్ కుమార్ చెప్పారు. నేరం జరిగిందా, లేదా అనే కోణంలో దర్యాప్తు చేస్తున్నట్లు ఆయన సోమవారం మీడియా ప్రతినిధులకు తెలిపారు. ఈ కేసులో న్యాయపరమైన అంశాలను పరిశీలిస్తున్నట్లు కూడా ఆయన తెలిపారు.