గుజరాత్‌ చేతిలో చిత్తుగా ఓడిన తలైవాస్‌.. ప్లే ఆఫ్స్‌ రేసు నుంచి ఔట్!!

పంచకుల: ప్రొ కబడ్డీ లీగ్‌ ఏడో సీజన్‌ ప్లే ఆఫ్స్‌ రేసు నుంచి తమిళ్‌ తలైవాస్‌ తప్పుకుంది. శనివారం జరిగిన మ్యాచ్‌లో తలైవాస్‌ 50-21తో గుజరాత్‌ ఫార్చూన్‌ జెయింట్స్‌ చేతిలో చిత్తు చిత్తుగా ఓడింది. ఈ ఓటమితో తలైవాస్‌ ప్లే ఆఫ్స్‌ ఆశలు ఆవిరయ్యాయి. గుజరాత్‌ రైడర్‌ సోను (15 పాయింట్లు), రోహిత్ గులియా (11 పాయింట్లు) సూపర్-10లతో సత్తా చాటితే.. ట్యాక్లింగ్‌లో పర్వేశ్ (5 పాయింట్లు) హైఫై సాధించాడు. తలైవాస్ తరఫున స్టార్ రైడర్ రాహుల్ చౌదరి 16 రైడ్లలో కేవలం 4 పాయింట్లు మాత్రమే చేసి పూర్తిగా విఫలమయ్యాడు. మరో సీనియర్ ప్లేయర్ అజయ్ ఠాకూర్ అందుబాటులో లేకపోవడంతో తలైవాస్‌కు ఓటమి తప్పలేదు.

మ్యాచ్ ఆరంభంమైన తొలి ఐదు నిమిషాలు తలైవాస్‌ మంచి ఆటను కనబరిచింది. అనంతరం తలైవాస్ స్వయం తప్పిదాలు చేస్తూ.. వెనుకబడిపోయింది. పుంజుకున్న గుజరాత్..10 నిమిషాల్లోపే తలైవాస్‌ను ఆలౌట్ చేసి 11-4తో ఆధిక్యంలోకి దూసుకెళ్లింది. అనంతరం కూడా అదే ఊపు కొనసాగిస్తూ.. 20-9తో తొలి అర్ధ భాగంను ముగించింది. విరామంఅనంతరం తలైవాస్‌ను మరోసారి ఆలౌట్ చేసిన గుజరాత్ 28-11తో తిరుగులేని ఆధిక్యంలో నిలిచింది. ఇక అదే ఆధిపత్యాన్ని కొనసాగిస్తూ వెళ్లిన గుజరాత్.. అలవోకగా మ్యాచ్‌ను సొంతం చేసుకుంది.

గుజరాత్ రైడింగ్‌లో 27 పాయింట్లు సాధిస్తే.. తలైవాస్ 13 మాత్రమే సాధించింది. ట్యాక్లింగ్‌లో గుజరాత్‌కు16 పాయింట్లు దక్కితే.. తలైవాస్‌కు కేవలం 7 పాయింట్లే వచ్చాయి. దీనికి తోడు తలైవాస్‌ కోర్టు మూడు సార్లు ఖాళీ కావడం కూడా ప్రత్యర్థికి కలిసొచ్చింది. రాహుల్‌ చౌదరి పూర్తిగా నిరాశ పరిచాడు. తలైవాస్‌ 13 ఓటములతో పాయింట్ల పట్టికలో చివరి స్థానంలో ఉంది.

ప్రొ కబడ్డీ లీగ్‌-7లో యూపీ యోధా జట్టు పేఆఫ్స్‌కు చేరువైంది. శనివారం జరిగిన మరో మ్యాచ్‌లో యూపీ 37- 30తో హరియాణా స్టీలర్స్‌పై గెలిచింది. యోధా రైడర్‌ శ్రీకాంత్‌ జాదవ్‌ 11 పాయింట్లతో రాణించగా.. నితీష్‌ కుమార్‌ 7 టాకిలింగ్స్‌ చేశాడు. మరో మ్యాచ్‌ నెగ్గితే యుపీకి పేఆఫ్స్‌ బెర్త్‌ ఖరారవుతుంది. నేటి మ్యాచ్‌ల్లో పుణేరి పల్టన్‌తో దబంగ్‌ ఢిల్లీ; గుజరాత్‌ ఫార్చూన్‌ జెయింట్స్‌తో హరియాణా స్టీలర్స్‌ తలపడతాయి.